နွေဦးတော်လှန်ရေး ၁၈ လကြာသောအခါ နိုင်ငံတဝှမ်းမှ တော်လှန်ရေး အင်အားစုများသည် ပိုမို အဆင့်မြင့်လာကြသည်။ ၎င်းတို့သည် လုပ်သေနတ်များဖြင့် တော်လှန်ရေးကို စတင်ခဲ့သော်လည်း ယခုအခါတွင် AK-47 ကဲ့သို့သော အော်တိုမက်တစ် သေနတ်များနှင့် ဒရုန်းများသုံးလာကြသည်။ နိုင်ငံအနှံ့အပြားမှ အမျိုးသမီးများသည်လည်း စစ်ကောင်စီကို ဆန့်ကျင်တိုက်ခိုက်နေသည့် အင်အားစုများတွင် ပါဝင်လာသည်။
၂၀၂၁ ခုနှစ်၊ ဖေဖော်ဝါရီလ ၁ ရက်နေ့တွင် အာဏာသိမ်းပြီးနောက် ၄ လအကြာ လွန်ခဲ့သောနှစ် မေလတွင် လက်နက်ကိုင် တော်လှန်ရေးစတင်ခဲ့သည်။ ထိုစဉ်မှစတင်ပြီး ပြည်သူ့ကာကွယ်ရေးတပ်များ (PDF) ဟု အများသိကြသည့် တော်လှန်ရေးအင်အားစုများကို နိုင်ငံတဝှမ်းတွင် ဖွဲ့စည်းကြသည်။ အမျိုးသမီးများသည်လည်း ဆေးတပ်သားများအဖြစ် လုပ်ကိုင်ကြသလို ရန်ပုံငွေလည်း ရှာဖွေပေးပြီး PDF အခြေခံစခန်းများကို ထောက်ပံ့ကာ တာဝန်ထမ်းဆောင်၍ PDF များတွင် ပါဝင်ကြသည်။
ထို့အပြင် စစ်အာဏာရှင်စနစ်ကို တိုက်ဖျက်ရန် အမျိုးသမီးများသာ ပါဝင်သော တပ်ဖွဲ့များကို အချို့ဒေသများတွင် ဖွဲ့စည်းကြသည်။ မြောင် အမျိုးသမီး စစ်သည်တော်များအဖွဲ့ကို လွန်ခဲ့သောနှစ် အောက်တိုဘာလတွင် စတင်ဖွဲ့စည်းပြီး ထိုသို့သော အမျိုးသမီးတပ်ဖွဲ့များအနက် တခုဖြစ်သည်။
မြောင် အမျိုးသမီးစစ်သည်တော်များ
စစ်ကိုင်းတိုင်းတွင် စစ်ကောင်စီတပ်များကို မိုင်းခွဲတိုက်ခိုက်ရာတွင် ကျော်ကြားသည့် မြောင် အမျိုးသမီး စစ်သည်တော်များ (M2W) ကို ဖက်ဆစ်စစ်အာဏာရှင်စနစ် အမြစ်ဖြတ်သုတ်သင်ရန်၊ အမျိုးသမီးများ တော်လှန်ရေးတွင် ပါဝင်နိုင်ကြောင်း ပြသရန်နှင့် အမျိုးသမီးများ၏ အခန်းကဏ္ဍကို မြှင့်တင်ရန်တို့အတွက် ဖွဲ့စည်းခဲ့ကြောင်း M2W ပြောခွင့်ရသူ မအမရာမှူးက ပြောသည်။
M2W တွင် လူထုအာဏာဖီဆန်ရေး လှုပ်ရှားမှု၌ ပါဝင်သော ကျောင်းဆရာမများ၊ တက္ကသိုလ် ဘွဲ့ရနှင့် ကျောင်းသူများ၊ လယ်ယာလုပ်ငန်း လုပ်ကိုင်သောကျေးရွာများမှ အမျိုးသမီးများ စသည်တို့ ပါဝင်သော တပ်ဖွဲ့ဝင် ၂၂၅ ဦးရှိသည်။ ၎င်းတို့သည် အသက် ၁၈ နှစ်မှ ၄၅ နှစ် အရွယ်အတွင်းဖြစ်သည်။
စစ်ကိုင်းတိုင်းတွင် စစ်ကောင်စီတပ်များကို မိုင်းခွဲတိုက်ခိုက်ရာတွင် ကျော်ကြားသည့် မြောင် အမျိုးသမီး စစ်သည်တော်များ (M2W) ကို ဖက်ဆစ်စစ်အာဏာရှင်စနစ် အမြစ်ဖြတ်သုတ်သင်ရန်၊ အမျိုးသမီးများတော်လှန်ရေးတွင် ပါဝင်နိုင်ကြောင်း ပြသရန်နှင့် အမျိုးသမီးများ၏ အခန်းကဏ္ဍကို မြှင့်တင်ရန်တို့အတွက် ဖွဲ့စည်းခဲ့ကြောင်း M2W ပြောခွင့်ရသူ မအမရာမှူးက ပြောသည်။
M2W စစ်သည်တော်များသည် စစ်ကောင်စီတပ်များကို မိုင်းခွဲတိုက်ခိုက်ရာတွင် တခါတရံ ပါဝင်ကြသော်လည်း ၎င်းတို့၏ အဓိကတာဝန်မှာ မိုင်းများထုတ်လုပ်ပြီး မြောင် မြို့နယ်အတွင်း လှုပ်ရှားနေသည့် PDF အဖွဲ့အနည်းဆုံး ၂၂ ဖွဲ့သို့ ဖြန့်ချိပေးရေးဖြစ်သည်။
“ဒီမိုင်းတွေရဲ့ အဖျက်စွမ်းအားက အမျိုးအစားပေါ် မူတည်တယ်။ ဖောက်ခွဲတိုက်ခိုက်မယ့် စစ်သား အရေအတွက်ကို ကြည့်ပြီး မိုင်းအမျိုးအစား ရွေးချယ်ရတာ။ စစ်ကားတွေအတွက်ဆိုရင် တမျိုး၊ ခြေလျင်စစ်သားတွေအတွက်ဆိုတမျိုး သုံးရတာ” ဟု အသက် ၂၀ ကျော်အရွယ်ရှိ မအမရာမှူးက ဧရာဝတီသတင်းဌာနသို့ ပြောသည်။
သူနှင့်အခြား M2W အဖွဲ့ဝင်များသည် စစ်သင်တန်းတက်ရောက်ခဲ့ပြီး အမျိုးသမီးများသာ ပါဝင်သော တပ်ဖွဲ့မဖွဲ့မီ မိုင်းထုတ်လုပ်သည့် နည်းလမ်းများကို လေ့လာရသည်။ မြောင် အရပ်သားကာကွယ်ရေးနှင့် လုံခြုံရေးအဖွဲ့အစည်းမှ ခေါင်းဆောင်များက ကချင်လွတ်လပ်ရေး တပ်မတော် (KIA) ထံမှ ၎င်းတို့ သင်ယူထားသည့် မိုင်းထုတ်လုပ်သည့် နည်းလမ်းများကို ပြန်လည် သင်ကြားပေးသည်။ M2W စစ်သည်တော်များသည် စစ်ကောင်စီတပ်များကို မိုင်းခွဲ တိုက်ခိုက်ခြင်းအား ၂၀၂၁ ခုနှစ်၊ အောက်တိုဘာလ ၃၀ ရက်နေ့က စတင်ခဲ့သည်။
“အမျိုးသားတွေက အမြဲလိုလို လက်နက်စွဲကိုင် တိုက်ခိုက်ချင်ကြတာ။ ဒါကြောင့် မိုင်းထုတ်လုပ်ရာမှာ အားနည်းချက် ဖြစ်နေတယ်။ ဒါကြောင့် M2W က မိုင်းထုတ်လုပ်ရေးကို အထူးလုပ်ဆောင်ဖို့ ဆုံးဖြတ်လိုက်တယ်” ဟု မအမရာမှူးက ပြောသည်။
M2W သည် တနှစ်အတွင်း မိုင်းအလုံးပေါင်း ၁,၁၃၀ ထုတ်လုပ်ခဲ့ပြီး အားလုံးကို စစ်ကောင်စီတပ်များကို တိုက်ခိုက်ရာတွင် အသုံးပြုသည်။ M2W သည် မြောင် မြို့နယ်အတွင်းရှိ တော်လှန်ရေး အင်အားစုများကို မိုင်းများမျှဝေပေးသည်။
M2W သည် တနှစ်အတွင်း မိုင်းအလုံးပေါင်း ၁,၁၃၀ ထုတ်လုပ်ခဲ့ပြီး အားလုံးကို စစ်ကောင်စီတပ်များကို တိုက်ခိုက်ရာတွင် အသုံးပြုသည်။ M2W သည် မြောင် မြို့နယ်အတွင်းရှိ တော်လှန်ရေး အင်အားစုများကို မိုင်းများမျှဝေပေးသည်။
ထို့အပြင် စစ်ကိုင်းတိုင်းမှ ချောင်းဦးနှင့် မြင်းမူမြို့နယ်များ၊ မကွေးတိုင်းမှ ရေစကြိုနှင့် မန္တလေးတိုင်းမှ ငါန်းဇွန်မြို့နယ်တို့မှ မဟာမိတ်တော်လှန်ရေး အင်အားစုများသည်လည်း M2W က ထုတ်လုပ်သည့် မိုင်းများကို အသုံးပြုကြသည်။
M2W သည် စတင်ဖွဲ့စည်းချိန်မှစတင်ပြီး အခြားမဟာမိတ်များနှင့် ပူပေါင်း၍ တိုက်ပွဲ ၈ ကြိမ် တိုက်ခဲ့ကာ ထိုတိုက်ပွဲများတွင် စစ်ကောင်စီစစ်သား ၈၅ ဦး သေဆုံးစေခဲ့သည်။ မိုင်းခွဲတိုက်ခိုက်မှု ၂၁ ကြိမ်ပြုလုပ်ပြီး စစ်ကောင်စီစစ်သား ၁၃၉ ဦးသေဆုံးစေကာ ၃၇ ဦး ဒဏ်ရာရသည်။
မိုင်းထုတ်လုပ်ရာတွင် အခက်အခဲများစွာ ရှိသော်လည်း M2W စစ်သည်တော်များသည် တော်လှန်ရေး အင်အားစုများအတွက် မိုင်းအများအပြား ထောက်ပံ့ရန် အကောင်းဆုံး လုပ်ဆောင်သည်။
“ဖောက်ခွဲပစ္စည်းတွေက အခက်အခဲ မရှိပေမယ့် လက်နက်စက်ရုံတွေမှာ ရှိတယ်” ဟု မအမရာမှူးက ပြောသည်။
“တခါတုန်းက ယမ်းတွေ ထုတ်လုပ်နေတုန်း လက်နက်စက်ရုံမှာ မီးလောင်လို့ အားလုံးထွက်ပြေးရတယ်” ဟု သူက ပြောပြသည်။
မိုင်းများ ထုတ်လုပ်ရာတွင်သုံးသည့် ဂဟေစက်များနှင့် ကျောက်ခွဲစက်များကို အသုံးပြုရာတွင်လည်း M2W တပ်ဖွဲ့ဝင်များအတွက် အခက်အခဲမရှိပေ။ ထိုစက်များကို အသုံးပြုစဉ် အချို့အမျိုးသမီးများ လက်တွင် ဒဏ်ရာရကြသည်။ အခြားအမျိုးသမီးများသည် ထိုးစစ်အတွေ့အကြုံ ရှိကြသည်။
“ရှေ့တန်းစစ်မျက်နှာမှာ နေရတုန်းက ကျမတို့ အနားကို အမြောက်ဆံကျလာပြီး သစ်ပင်ကြီးတပင် လဲကျသွားတယ်။ အဲဒါက ပထမဆုံးအကြိမ် အပစ်ခံရတာဆိုတော့ တော်တော်ကြောက်သွားတယ်” ဟု မအမရာမှူးက ပြန်ပြောပြသည်။
လူမျိုးစု အမျိုးသမီး ရဲဘော်များ
အချို့လူမျိုးစု အမျိုးသမီးများသည်လည်း KIA ၊ ကရင်အမျိုးသား အစည်းအရုံး (KNU)၊ ကရင်နီအမျိုးသားများ ကာကွယ်ရေးတပ်မတော် (KNDF) နှင့် ချင်းကာကွယ်ရေး တပ်မတော် (CDF) စသည့် လူမျိုးစုလက်နက်ကိုင် အဖွဲ့အစည်းများ (EAO) တွင် ပါဝင်နေကြသည်။
KNDF တပ်ရင်း (၅) အမျိုးသမီးတပ်ဖွဲ့ကို ၂၀၂၁ ခုနှစ်၊ မေလတွင် စတင်ဖွဲ့စည်းပြီး အဖွဲ့ဝင် ဒါဇင်ပေါင်း များစွာပါဝင်သည်။ KNDF သည် စစ်အာဏာသိမ်းမှု နောက်ပိုင်းတွင် အမျိုးသမီးတပ်ဖွဲ့ ပထမဆုံး ဖွဲ့စည်းသည့် လူမျိုးစုလက်နက်ကိုင် အဖွဲ့အစည်းဖြစ်သည်။
အမျိုးသမီးအများအပြားသည် တော်လှန်ရေးတွင် ပါဝင်ရန် စိတ်အားထက်သန်သောကြောင့် KNDF သည် အမျိုးသမီးတပ်ဖွဲ့ကို ဖွဲ့စည်းဖြစ်ကြောင်း KNDF အမျိုးသမီးတပ်ဖွဲ့မှ ပြောခွင့်ရသူ စိုးမြာက ပြောသည်။ တပ်ဖွဲ့ဝင်များသည် အသက် ၁၈ နှစ်မှ ၂၅ နှစ်ကြား အရွယ်များဖြစ်သည်။ ၎င်းတို့သည့် ယခုကဲ့သို့ လက်နက်မကိုင်မီက ကျောင်းသားကျောင်းသူများ၊ သပိတ်မှောက်ရာတွင် ပါဝင်ခဲ့သည့် ဆရာမများနှင့် ပြည်သူ့ ဝန်ထမ်းများဖြစ်သည်။
အသက် ၁၈ နှစ်ရှိပြီး ကယားပြည်နယ်မှ ကျောင်းသူဟောင်း စိုးမြာသည် စစ်အာဏာရှင်စနစ်ကို တိုက်ဖျက်ရန်အတွက် KNDF အမျိုးသမီးတပ်ဖွဲ့တွင် ၂၀၂၁ ခုနှစ်၊ သြဂုတ်လ၌ ပါဝင်လာခြင်းဖြစ်သည်။
“ရှေ့တန်းစစ်မျက်နှာမှာ တိုက်ခိုက်နေတဲ့ အမျိုးသမီးတပ်ဖွဲ့ဝင်တွေ အများရှိတယ်။ အမျိုးသမီးတွေ ရှေ့တန်းစစ်မျက်နှာမှာ စစ်တိုက်တာ မထူးဆန်းတော့ဘူး” ဟု စိုးမြာက ဧရာဝတီ သတင်းဌာနသို့ ပြောသည်။
KNDF အမျိုးသမီး တိုက်ခိုက်ရေးသမားများသည် တိုက်ခိုက်ရေးတွင်သာ အာရုံစိုက်သည် မဟုတ်ဘဲ ဆေးဝန်ထမ်းများနှင့် အခြားအထောက်အကူပြု လုပ်ငန်းများကိုလည်း လုပ်ကိုင်ကြသည်။ “တော်လှန်ရေး ကဏ္ဍအမျိုးမျိုးမှာ ကျမတို့ တတ်နိုင်တာ အကုန်လုပ်ပြီး ကျမတို့အမျိုးသမီးတွေ စစ်တပ်ကို တိုက်ခိုက်နေတယ်” ဟု စိုးမြာက ပြောသည်။
KNDF မှ အမျိုးသမီး တပ်ဖွဲ့ဝင်များကဲ့သို့ပင် ချင်းပြည်နယ်မှ အမျိုးသမီးအချို့သည် လွန်ခဲ့သော နှစ်မှစတင်ပြီး CDF သို့ ဝင်ရောက်ကြသည်။
ချင်းပြည်နယ်တွင် တော်လှန်ရေး အဖွဲ့အစည်း ၂၇ ခုခန့်ရှိသည်။ စုစုပေါင်း အင်အား ၉,၀၀၀ ခန့်ရှိသော အဖွဲ့ ၁၆ ဖွဲ့ခန့်သည် ချင်းပြည်ပူးတွဲကာကွယ်ရေး ကော်မတီ (CJDC) တွင် ပါဝင်နေသည်။ ချင်းပြည်နယ်မှ တော်လှန်ရေး အဖွဲ့အစည်း ၁၃ ခုတွင် အမျိုးသမီးတပ်ဖွဲ့ဝင် ၅၀၀ ခန့်ရှိသည်ဟု CJDC ထံမှ သိရသည်။
CDF-မင်းတပ်တွင် အမျိုးသမီးတပ်ဖွဲ့ဝင် အများဆုံးရှိပြီး ၁၂၀ ခန့်ရှိသည်။
ချင်း PDFs နှင့် EAOs မှ အမျိုးသမီးအများစုသည် ကျောင်းသူများဖြစ်ကြောင်း အမျိုးသမီးတပ်ဖွဲ့ဝင် ၉၀ ခန့် ပါဝင်သော CDF-ကန်ပက်လက် တပ်ရင်း (၁) အဖွဲ့ဝင် ဒေစီက ပြောသည်။
ချင်း PDF နှင့် EAO မှ အမျိုးသမီးအများစုသည် ကျောင်းသူများဖြစ်ကြောင်း အမျိုးသမီးတပ်ဖွဲ့ဝင် ၉၀ ခန့် ပါဝင်သော CDF-ကန်ပက်လက် တပ်ရင်း (၁) အဖွဲ့ဝင် ဒေစီက ပြောသည်။
“ကျမတို့က စစ်အာဏာရှင်စနစ်ကို လက်မခံဘူး။ မှန်ကန်မျှတတဲ့ ပြည်သူ့အုပ်ချုပ်ရေးစနစ်ပဲ လိုချင်တယ်” ဟု ဒေစီက ဧရာဝတီ သတင်းဌာနသို့ ပြောသည်။
အသက် ၂၂ နှစ်ရှိပြီဖြစ်သော ဒေစီသည် CDF သို့ ဝင်ရောက်ပြီး စီမံအုပ်ချုပ်သည့် အပိုင်းတွင် တာဝန် မထမ်းဆောင်မီက တက္ကသိုလ်ကျောင်းသူ ဖြစ်သည်။ အချို့ အမျိုးသမီးတပ်ဖွဲ့ဝင်များက ရှေ့တန်းသို့ သွားကြသည်။ အချို့သည် တိုက်ခိုက်ရေးသမားများကို ထောက်ပံ့သည့် လုပ်ငန်းများ လုပ်ကိုင်သည်။
“တော်လှန်ရေးမှာ တိုက်ခိုက်ရေး သာမကဘူး နည်းလမ်းအမျိုးမျိုးနဲ့ ပါဝင်နိုင်တယ်” ဟု ဒေစီက ပြောသည်။ တော်လှန်ရေးသည် မည်သည့် ပိုင်ဆိုင်မှုမျှမရှိဘဲ စတင်ခဲ့သော်လည်း ယခုအခါ လက်နက်နှင့် ဘဏ္ဍာရေးအရ တိုးတက်မှုအချို့ ရှိလာသည်ဟုလည်း ဒေစီက ပြောသည်။
ကျား အမျိုးသမီး ဒရုန်းတပ်ဖွဲ့
M2W အပါအဝင် ခုခံတော်လှန်ရေးတပ်များသည် စစ်ကောင်စီ ပစ်မှတ်များကို ဗုံးကြဲရန် ဒရုန်းများကိုလည်း အသုံးပြုကြသည်။
ကျား အမျိုးသမီး ဒရုန်းတပ်ဖွဲ့ (TGR) သည် မြောင် ပြည်သူ့ကာကွယ်ရေးတပ်ဖွဲ့တွင် ပါဝင်ပြီး လွန်ခဲ့သောနှစ် သြဂုတ်လမှစတင်ကာ မန္တလေး-မုံရွာလမ်းတွင် စစ်ကောင်စီယာဉ်တန်းများကို တိုက်ခိုက်နေသည်။
အမျိုးသား တော်လှန်ရေးသမားများနည်းတူ စစ်ကောင်စီတပ်များကို တိုက်ခိုက်ရန်အတွက် TGR ကို ၂၀၂၂ သြဂုတ်လတွင် အဖွဲ့ဝင် ၁၅ ဦးနှင့် စတင်ထူထောင်သည်။
“အမျိုးသားတပ်ဖွဲ့ဝင်တွေက စစ်ကောင်စီတပ်တွေကို တိုက်ခိုက်တဲအချိန်မှာ အမျိုးသမီး PDF အဖွဲ့ဝင်တွေကလည်း အလားတူ ပါဝင်ချင်ကြတယ်။ ဒါကြောင့်မို့လို့ ကျမတို့က စစ်ကောင်စီ စစ်သားတွေကိုတိုက်ဖို့နဲ့ အမျိုးသမီးတွေလည်း စစ်တိုက်နိုင်တယ်ဆိုတာကို ပြသဖို့ ဒရုန်းတပ်ဖွဲ့ ဖွဲ့လိုက်တယ်” ဟု TGR ခေါင်းဆောင် ကျားခင်စိန်က ပြောသည်။
အဖွဲ့ဝင်များသည် နယ်ပယ်အမျိုးမျိုးမှ လာကြသူများဖြစ်ပြီး ဒရုန်းများဖြင့် လအတန်ကြာ လေ့ကျင့်ရသည်။ TGR တွင် အမေရိကန် ဒေါ်လာ ၅,၀၀၀ စီတန်သည့် ဒရုန်း ၂ စီးရှိပြီး မြောင် ပြည်သူ့ကာကွယ်ရေးတပ်က ထုတ်လုပ်သည့် ဗုံးများကို အသုံးပြုသည်။
ထိုတပ်ဖွဲ့သည် စစ်ကိုင်းတိုင်းတွင် ဒရုန်းဖြင့် တိုက်ခိုက်မှုများပြုလုပ်ပြီး အထူးသဖြင့် မန္တလေး-မုံရွာလမ်းကို အသုံးပြုသည့် စစ်ယာဉ်တန်းများကို တိုက်ခိုက်သည်။ အောက်တိုဘာလအထိ တိုက်ခိုက်မှု ၃၀ ခန့် ဆောင်ရွက်ထားပြီး စစ်ကောင်စီစစ်သား ၄၈ ဦးခန့်ကို သေဆုံးစေသည်။
“စစ်ကောင်စီတပ်က လူအင်အားဖြည့်တင်းတာ အားလုံးအတွက် မန္တလေး-မုံရွာလမ်းကို သုံးတယ်။ ဒါကြောင့် အဲဒီလမ်းကို သူတို့သုံးမရအောင် ကျမတို့က ဖြတ်တောက်ချင်တယ်။ ဒါကြောင့် ဒီလမ်းကြောင်းမှာ ဒရုန်းနဲ့တိုက်တယ်” ဟု TGR ခေါင်းဆောင် ကျားခင်စိန်က ပြောသည်။ သို့သော် ထိုတပ်ဖွဲ့သည် တိုက်ခိုက်မှုများ ဆောင်ရွက်ရာတွင် အခက်အခဲနှင့် အန္တရာယ်များသော အခြေအနေများကို ရင်ဆိုင်ရသည်။
“ဗုံးကြဲဖို့ ကြိုးစားရင်း စစ်ကောင်စီ ကင်းထောက်တွေက ကျမတို့ကို ပစ်ခတ်ရင် ပြေးကြရတယ်” ဟု ကျားခင်စိန်က ပြောသည်။
တော်လှန်ရေးအတွက် ဆုံးဖြတ်ထား
တော်လှန်ရေးတွင် ပါဝင်နေသော အမျိုးသမီးများသည် စစ်ကောင်စီ ပြုတ်ကျသည့်အထိ ဆက်လက် တိုက်ပွဲနေကြပြီး ပြည်သူလူထုအနေဖြင့် တော်လှန် တိုက်ခိုက်ရေးသမားများကို ပြည်သူလူထုက ယုံကြည်စေလိုကြသည်။
“ကျမတို့ ဒီမိုကရေစီ လိုချင်တယ်။ ကျမတို့နိုင်ငံ လွတ်မြောက်စေဖို့ စစ်တပ်ကို ကျမတို့ တိုက်ခိုက်နေတယ်။ ဖက်ဒရယ် ဒီမိုကရေစီအတွက် ပြည်သူအားလုံး တိုက်ခိုက်မယ်လို့ ကျမတို့ ယုံကြည်တယ်” ဟု ကျားခင်စိန်က ဧရာဝတီ သတင်းဌာနသို့ ပြောသည်။
တော်လှန်ရေးတွင် ပါဝင်နေသော အမျိုးသမီးများသည် စစ်ကောင်စီ ပြုတ်ကျသည့်အထိ ဆက်လက် တိုက်ပွဲနေကြပြီး ပြည်သူလူထုအနေဖြင့် တော်လှန် တိုက်ခိုက်ရေးသမားများကို ပြည်သူလူထုက ယုံကြည်စေလိုကြသည်။
PDF များသို့ပူးပေါင်းလာသော အမျိုးသား၊ အမျိုးသမီးများကို ပြည်သူ့စစ်သားများအဖြစ် သတ်မှတ်ပြီး တော်လှန်ရေးအတွက် အသက်ကို ပေးဆပ်မည့်သူများ ဖြစ်သော်လည်း ၎င်းတို့အတွက် လက်နက်ခဲယမ်း လိုအပ်ကြောင်းလည်း သူကပြောသည်။ တော်လှန်ရေး အင်အားစုများအတွက် လက်နက်များ ဝယ်ယူနိုင်ရန် ပြည်တွင်းပြည်ပမှ ပြည်သူများအနေဖြင့် လှူဒါန်းကြရန် ကျားခင်စိန်က တောင်းဆိုသည်။
တော်လှန်တိုက်ခိုက်ရေးသမား အားလုံးသည် အသက် စတေးရန် အသင့်ရှိပြီး တော်လှန်ရေး အောင်မြင်ရမည်ဟု ယုံကြည်ကြသည်။
“ကျမတို့က စစ်အာဏာရှင်စနစ် အဆုံးသတ်သည်အထိ တိုက်ခိုက်မှာ ဖြစ်တဲ့အတွက် ပြည်သူတွေအနေနဲ့ စိတ်ဓာတ်ခိုင်မာစေချင်တယ်” ဟု KNDF အမျိုးသမီးတပ်ဖွဲ့ဝင် စိုးမြာက ပြောသည်။
(ဧရာဝတီ အင်္ဂလိပ်ပိုင်းမှ Yuzana ၏ Myanmar’s Women Warriors Fight for Democracy ကို ဘာသာပြန် ဖော်ပြသည်။)
You may also like these stories:
စစ်အာဏာသိမ်းဆန့်ကျင်ရေးနဲ့ ရာသီသွေးလာချိန်
တော်လှန်ရေးမှာ လိင်မှုဆိုင်ရာ အတွေးအမြင်တွေပါ ပြောင်းလဲပစ်ကြ
နွေဦးတော်လှန်ရေးလှိုင်းလုံးထဲက LGBTIQ များ
အာဏာရှင်ကို အမြစ်ဖြတ်ချင်တဲ့ အမျိုးသမီး PDF ကွန်မန်ဒိုများ
The post ဒီမိုကရေစီတိုက်ပွဲဝင် အမျိုးသမီး စစ်သည်တော်များ appeared first on ဧရာဝတီ.
