မြန်မာ့ဂုဏ်ဆောင် နှစ်ထပ်ကွမ်းချန်ပီယံ အောင်လအန်ဆန်း အနေဖြင့် ဇွန် ၂၉ ရက်နေ့တွင် MMA ကမ္ဘာ့ မစ်ဒယ်ဝိတ် ချန်ပီယံနေရာတွင် ဆက်လက်တည်မြဲရန် အတွက် ပထမဆုံးအကြိမ် ကာကွယ် ထိုးသတ် တော့မည်ဖြစ်သည်။
တိတိကျကျဆိုရလျှင် ပြီးခဲ့သည့် ၂၀၁၇ ခုနှစ် ဇွန်လက ရန်ကုန်မြို့တွင်ကျင်းပသည့် “Light Of A Nation” ပြိုင်ပွဲတွင် ရှုံးပွဲမရှိသော MMA မစ်ဒယ်ဝိတ် ချန်ပီယံ ဗစ်တာလီ ဘစ်ဒက်ရှ်ကို အနိုင်ယူပြီး ချန်ပီယံဖြစ်ခဲ့သည့်နောက်ပိုင်း ပထမဆုံးအကြိမ်အဖြစ် မစ်ဒယ်ဝိတ် ချန်ပီယံခါးပတ်ကို အောင်လအန်ဆန်း ကာကွယ်ထိုးသတ်ရမည်ဖြစ်သည်။
အောင်လအန်ဆန်း၏ မစ်ဒယ်ဝိတ် ချန်ပီယံဘွဲ့ကို လုယူဖို့ကြိုးစားမည့်သူက ဂျပန်ဖိုက်တာ ကန် ဟာဆီဂါဝါ(Ken Hasegawa) ဖြစ်သည်။ ဟာဆီဂါဝါ ဆိုသူက ဂျပန်နိုင်ငံရှိ ကိုယ်ခံပညာသိုင်းပေါင်းစုံပြိုင်ပွဲ – MMAလောက၏ မစ်ဒယ်ဝိတ်တန်းတွင် နံပါတ်ဝမ်း ဖိုက်တာတဦးဖြစ်ပြီး ၂၀၁၀ ပြည့်နှစ်မှစတင်၍ ခက်ခဲ ကြမ်းတမ်းသည့် MMA လောကထဲ ဝင်ရောက်ခဲ့သူ ဖြစ်သည်။
ဟာဆီဂါဝါ၏ MMA ဖိုက်တာဘ၀ ၈ နှစ်တာကာလအတွင်း ဂျပန်နိုင်ငံ၏ သိုင်းပေါင်းစုံ ကိုယ်ခံပညာပြိုင်ပွဲများ ဖြစ်သည့် Deep နှင့် Rizin ပွဲများတွင် ၁၈ ပွဲထိုးသတ်ခဲ့ရာ ၁၆ ပွဲ အနိုင်ရရှိထားသူ ဖြစ်သည်။ အနိုင်ရခဲ့သည့် ၁၆ ပွဲတွင် အလဲထိုးဖြင့် ၆ ပွဲ၊ ပိုင်နိုင်သည့်ချုပ်နှောင်မှုဖြင့် ပြိုင်ဘက်က အရှုံးပေးစေခဲ့သည့်ပွဲ ၄ ပွဲနှင့် ဒိုင်အဖွဲ့ အဆုံးအဖြတ်ဖြင့် ၆ ပွဲ အနိုင်ရရှိထားသူ ဖြစ်သည်။
ပြိုင်ဘက်ကို ခြေကန်ချက်၊ လက်သီးချက်များဖြင့် တိုက်ခိုက်လေ့ရှိပြီး အထိုးခံ၊ အနာခံ၍ ပြိုင်ဘက်ကို ချုပ်နှောင်ကာ အနိုင်ယူတတ်သည့် အသက် ၃၁ နှစ်အရွယ်ရှိ ဟာဆီဂါဝါအနေဖြင့် ဝမ်းချန်ပီယံရှစ် ONE Championship ပြိုင်ပွဲသို့ ပထမဆုံးအကြိမ် ဝင်ရောက် ယှဉ်ပြိုင်ခြင်းဖြစ်သည်။ ၎င်းဘဝ၏ပထမဆုံးသော ဝမ်းချန်ပီယံရှစ်ပွဲတွင် ရင်ဆိုင်ထိုးသတ်ရန်အတွက် မြန်မာပရိတ်သတ် အချစ်တော် MMA ချန်ပီယံခါးပတ်၂ ခုပိုင်ရှင် အောင်လအန်ဆန်းကို ရွေးချယ်ခဲ့ပြီး ဘဝအတွက် ကြီးမားသည့်စိန်ခေါ်မှုတရပ်ကို ဟာဆီဂါဝါရွေးချယ်ခဲ့ခြင်း ဖြစ်သည်။
ကိုယ်ခံပညာ သိုင်းပေါင်းစုံ အသုံးပြုတိုက်ခိုက်သည့် MMA ပြိုင်ပွဲတိုင်းက ကြမ်းတမ်းခက်ထန်သည်ချည်း ဖြစ်သည်။ ထိုအထဲတွင်မှ ဟာဆီဂါဝါ ယှဉ်ပြိုင်ရမည့်သူက မြန်မာ့မြေပေါ်တွင် ပြိုင်ဘက်တိုင်းကို အနိုင်ယူပြီး ရှုံးပွဲမရှိ စံချိန်ရယူထားသူ အောင်လအန်ဆန်း ဖြစ်နေခဲ့သည့်အတွက် ဇွန်လ ၂၉ ရက်နေ့တွင် ရန်ကုန်မြို့၊သုဝဏ္ဏအားကစားရုံတွင် ယှဉ်ပြိုင်မည့် “ONE : SPIRIT OF A WARRIOR” အောင်လအန်ဆန်းနှင့်ပွဲကဟာဆီဂါဝါ၏ MMA ကစားသမား ဘဝတလျှောက် အခက်ခဲဆုံးပွဲစဉ် တပွဲ ဖြစ်လာဖို့ ရှိနေသည်။
အောင်လအန်ဆန်းကို ရင်ဆိုင်ဖို့ စိုးရိမ်ခြင်းမရှိဘဲ အနိုင်ရဖို့ ရာနှုန်းပြည့် ယုံကြည်ထားကြောင်းဟာဆီဂါဝါက ဝမ်းချန်ပီယံရှစ်နှင့် အင်တာဗျူးတွင် ပြောဆိုထားသည်။
“၈ နှစ်တာကာလ တလျောက်လုံး အကောင်းဆုံး ကြိုးစားအောင်မြင်ခဲ့တဲ့ ပရောဖက်ရှင်နယ်တဦးအနေနဲ့ လျှောက်လှမ်း လာခဲ့တာဟာ အခုဆို ကျနော့်ရဲ့ ကစားသမားဘ၀ နောက်တဆင့်ကို ရောက်ရှိလို့လာပါပြီ။ ကျနော့် အတွက် သိမ်းထားတဲ့ ဒီဆုအတွက် သိပ်ကို စိတ်လှုပ်ရှားနေပါတယ်။ ဒီခါးပတ်အတွက် အောင်လ အန်ဆန်းနဲ့ ရင်ဆိုင်တွေ့ဆုံရမှာ ကိုလည်း ဂုဏ်ယူပါတယ်။ သူ့ရဲ့အောင်မြင်မှုတွေနဲ့အတူ သူ့ကိုလည်း ကျနော် လေးစားပါတယ်။ ဒါပေမယ့် ဒီပွဲမှာ အောင်နိုင်မယ်လို့ ကျနော့်မှာ ယုံကြည်မှုရှိပါတယ်။ မစ်ဒယ်ဝိတ်တန်း ကမ္ဘာ့ချန်ပီယံ အသစ်အဖြစ် ဒိုင်လူကြီးက ကျနော့်ရဲ့လက်ကို မြှောက်ပြီးအောင်ပွဲခံမှာပါ” ဟု ဟာဆီဂါဝါက ပြောဆိုခဲ့သည်။
အောင်လအန်ဆန်း အတွက်တော့ ဟာဆီဂါဝါနှင့်ပွဲက ကစားသမားဘ၀ သက်တမ်းတလျှောက် ဂျပန်ဖိုက်တာ တစ်ဦးနှင့် ပထမဆုံး ထိုးသတ်သော ပွဲစဉ် ဖြစ်သည်။ ပြိုင်ဘက်မှာ ဂျူဒို ခါးပတ်နက် ပညာရှင် တဦးဖြစ်ပြီး ခံနိုင်ရည်နှင့် သက်လုံမြင့်မားသည့် MMA ဖိုက်တာဖြစ်နေသည့်အတွက်အထင်သေး၍ မရကြောင်း ပြောသည်။
“သူက ခံနိုင်ရည်အများကြီးရှိတယ်။ သူများထိုးတဲ့ဒဏ်ကို အများကြီးခံနိုင်တယ်။ သူက ဂျူဒိုခါးပတ်နက်ဆိုတော့ ကောင်းမွန်တဲ့ နည်းစနစ်တွေရှိတယ်။ သူက အထင်သေးလို့ မရဘူး။ ဂျပန်က မစ်ဒယ်ဝိတ်ဖိုက်တာ အားလုံးမှာ သူက နံပါတ်ဝမ်း။ ဂျပန်ဖိုက်တာတွေက အရမ်းအထိုးခံနိုင်တယ်။ ကျနော်ကလည်း ဂျပန်ကဖိုက်တာတွေနဲ့ တခါမှ မထိုးဘူးတော့ ဒီပွဲက ရင်ခုန်စရာကောင်းတဲ့ပွဲ ဖြစ်လာမှာပါ” ဟု အွန်လိုင်းမှတဆင့် သတင်းမီဒီယာ များနှင့် တွေ့ဆုံပွဲတွင် ပြောဆိုခဲ့သည်။
ဘရာဇီးဖိုက်တာ လီရန်ဒရို အက်တိုင်းဒီးစ်မှာ အင်ဒိုနီးရှားနိုင်ငံ ဂျကာတာမြို့တွင် မေလ ၁၂ ရက်နေ့က ကျင်းပခဲ့သည့် Grit and Glory ပွဲစဉ်တွင် အောင်လအန်ဆန်း၏ ပြိုင်ဘက်ဟောင်းဖြစ်ပြီး ကမ္ဘာ့မစ်ဒယ်ဝိတ် ချန်ပီယံဟောင်း ဗစ်တာလီ ဘစ်ဒက်ရှ်အား အလဲထိုးအနိုင်ယူခဲ့သည့်အတွက် ဇွန်လ ၂၉ ရက် နေ့တွင် လက်ရှိချန်ပီယံ အောင်လအန်ဆန်းနှင့် မစ်ဒယ်ဝိတ်ချန်ပီယံ ခါးပတ်လုပွဲ ယှဉ်ပြိုင်ထိုးသတ်ခွင့် ရရှိခဲ့သည်။
သို့သော် အက်တိုင်းဒီးစ် ကိုယ်တိုင်က အောင်လနှင့် ထိုးသတ်ဖို့အတွက် အချိန်ယူလေ့ကျင့်လိုကြောင်း ပြောဆိုခဲ့သည့်အတွက် ဝမ်းချန်ပီယံရှစ်အဖွဲ့က ဂျပန်ဖိုက်တာ ကန် ဟာဆီဂါဝါနှင့် ထိုးသတ်ရန် စီစဉ်ခဲ့ခြင်းဖြစ်သည်။
ထို့ကြောင့် မွေးရပ်မြေ မြန်မာနိုင်ငံတွင် ထိုးသတ်မည့် “ONE : SPIRIT OF A WARRIOR” ပြိုင်ပွဲတွင်One Championship အဖွဲ့၏ နှစ်ထပ်ကွမ်း ချန်ပီယံ အောင်လအန်ဆန်းအနေဖြင့် ဟာဆီဂါဝါကိုအနိုင်ရခဲ့ပါက နှစ်ထပ်ကွမ်း ချန်ပီယံအဖြစ် ဆက်လက်ရပ်တည်နိုင်မည် ဖြစ်ပြီး ရှုံးနိမ့်ခဲ့ပါက မစ်ဒယ်ဝိတ် ချန်ပီယံဘွဲ့ စွန့်လွှတ်ရမည် ဖြစ်ကာ လိုက်ဟဲဗီးဝိတ် ချန်ပီယံအဖြစ်သာ ဆက်လက်ရပ်တည်နိုင်မည်ဖြစ်သည်။လအန်ဆန်းနှင့် ဟာဆီဂါဝါတို့၏ ကစားသမားဘ၀ ထိုးသတ်မှု မှတ်တမ်းများကို နှိုင်းယှဉ်ကြည့်လျှင်မြန်မာတို့၏အချစ်တော် အောင်လက ဂျပန်ဖိုက်တာထက် များစွာသာလွန်နေသည်။
အောင်လအန်ဆန်းမှာ ၂၀၀၅ ခုနှစ်မှ စတင်ကာ MMA လောကသို့ ဝင်ရောက်ခဲ့သူဖြစ်ပြီး ကစားသမားဘ၀ သက်တမ်းတလျှေက်၃၂ ပွဲထိုး၊ ၂၂ ပွဲနိုင်၊ ၁၀ ပွဲရှုံးရလဒ်ကို ပိုင်ဆိုင်ထားသူ ဖြစ်သည်။ ရန်ကုန်မြို့တွင် ၂၀၁၇ ခုနှစ် ဇွန်လက ကျင်းပသည့် Light of a Nation ပြိုင်ပွဲတွင် ကမ္ဘာ့မစ်ဒယ်ဝိတ်ချန်ပီယံ ဘစ်တာလီ ဘစ်ဒက်ရှ်ကို ဒိုင်အဖွဲ့၏ဆုံးဖြတ်ချက်ဖြင့် အနိုင်ရခဲ့ပြီး မြန်မာပြည်ကိုယ်စားပြု ပထမဆုံးသော မစ်ဒယ်ဝိတ်ချန်ပီယံ ဖြစ်လာခဲ့သည်။
ထို့နောက် ယခုနှစ် ဖေဖော်ဝါရီလက ကျင်းပခဲ့သည့် Quest For Gold ပြိုင်ပွဲတွင် ၎င်းထိုးသတ်နေသည့် မစ်ဒယ်ဝိတ်ထက် တဆင့်မြင့်သည့် လိုက်ဟဲဗီးဝိတ် ကစားသမား မာချာဒိုကို အနိုင်ယူကာ ဝမ်းချန်ပီယံရှစ်၏ ပထမဆုံးသော မစ်ဒယ်ဝိတ်နှင့် လိုက်ဟဲဗီးဝိတ် နှစ်ထပ်ကွမ်းချန်ပီယံ အောင်လအန်ဆန်းအဖြစ် မှတ်တမ်းသစ် ရေးထိုးထားခဲ့သူ ဖြစ်သည်။အောင်လအနေဖြင့် ၎င်း၏မွေးရပ်မြေဖြစ်သည့် မြန်မာနိုင်ငံတွင် ၂၀၁၆ ခုနှစ်မှစတင်၍ ထိုးသတ်မှုများ ပြုလုပ်ခဲ့ရာ ၂၀၁၆ အတွင်းထိုးသတ်သည့်ပွဲစဉ် ၂ ပွဲစလုံး အနိုင်ရခဲ့သည်။ ထို့နောက် ၂၀၁၇ ဇွန်လတွင်ဘစ်တာလီ ဘစ်ဒက်ရှက်ကို အနိုင်ယူခဲ့ပြီး နိုဝင်ဘာလတွင်လည်း ၎င်းထက် ဝိတ်တန်းမြင့်သည့် ဟဲဗီးဝိတ် ဖိုက်တာ အလိန်း ငလာနီကို အလဲထိုးဖြင့် အနိုင်ယူခဲ့သူဖြစ်သည်။ ယခုနှစ် ဖေဖော်ဝါရီလတွင် ရန်ကုန်မြို့သုဝဏ္ဏမိုးလုံလေလုံ အားကစားခန်းမ၌ ဘရာဇီးဖိုက်တာ မာချာဒိုကို အနိုင်ယူ၍ မြန်မာ့မြေပေါ်တွင် ၅ ပွဲထိုး၅ ပွဲနိုင်ဖြင့် ရာနှုန်းပြည့် အနိုင်ရထားသည့်စံချိန်ကို ရေးထိုးထားသူ ဖြစ်သည်။
ယခင်ထိုးသတ်သည့် ပွဲစဉ်များတွင် ပထမအချီမှာပင် ပြိုင်ဘက်များကို ပွဲသိမ်းနိုင်ခဲ့သော်လည်း ယခုလအတွင်း ထိုးသတ်မည့် ဟာဆီဂါဝါနှင့်ပွဲမှာတော့ ပွဲချိန်ရှည်ကြာနိုင်ကြောင်း အောင်လအန်ဆန်းက ပြောဆိုသည်။
“သူက ဂျပန်ဖိုက်တာဖြစ်တဲ့အတွက် ခံနိုင်ရည်အရမ်းကောင်းတယ်။ ဒီပွဲကနည်းနည်းရှည်မယ်လို့ ယုံကြည် ပါတယ်။ လာကြည့်တဲ့ပရိသတ်တွေ အကြိုက်တွေ့အောင် ကျနော်အကောင်းဆုံး ကစားပေးမယ်။ သူပေးတဲ့ အခွင့်အရေးကို အရယူမယ်။ အကောင်းဆုံးဖြစ်အောင်တော့ ကြိုးစားထားတယ်” ဟု မီဒီယာများနှင့်တွေ့ဆုံပွဲတွင် အောင်လအန်ဆန်းက ပြောဆိုခဲ့သည်။ဟဲဗီးဝိတ်ဖိုက်တာ အလိန်း ငလာ့နီ၊ လိုက်ဟဲဗီးဝိတ်ဖိုက်တာ မာချာဒိုတို့နှင့် ထိုးသတ်ခဲ့သည့်ပွဲစဉ်များတွင်ပထမအချီမှာပင် အောင်လအန်ဆန်းက အနိုင်ယူခဲ့သည့်အတွက် မြန်မာပရိသတ်တချို့က လုပ်ပွဲဟု ဝေဖန်ပြောဆိုမှုများ ရှိခဲ့ပြီး အဆိုပါပြောဆိုချက်များအပေါ် အောင်လအန်ဆန်းက ယခုလို ရှင်းပြသည်။
“အဲဒါကတော့ ပြိုင်ပွဲအပေါ် သိပ်ပြီးတော့ ရင်းနှီးကျွမ်းဝင်မှု မရှိကြလို့ လုပ်ပွဲလို့ ထင်ကြတာ နေမှာပါ။ ဘာလို့ဆိုတော့ ကျနော်ကစားခဲ့တဲ့ပွဲတွေမှာ ဘရာဇီးက ကစားသမား (မာချာဒို) ဆိုရင်လည်း နှစ်ပေါင်း၂၀ လောက် ဂျူဒို၊ ကရာတေးစတဲ့ ကိုယ်ခံပညာရပ်ပြိုင်ပွဲ (Martial Arts) မှာ ကစားနေတာပါ။ အရမ်းကို သမ္ဘာရင့်တဲ့သူပါ။ အဲ့လိုလူတွေနဲ့ပွဲကို လုပ်ပွဲလို့ ဘယ်လိုစဉ်းစားလိုက်လဲ မသိဘူး။ သူက ကျနော့်ကို ဖမ်းချုပ်ထားလိုက်ရင်လည်း လွတ်ဖို့တော်တော်ခက်တယ်” ဟု သူက ရှင်းပြသည်။
ဆက်လက်ပြီး “အလိန်း (Alain Ngalani) နဲ့ကစားတဲ့အခါမှာလည်း သူက ကစ်ဘောက်ဆင်ကစားတာ နှစ်ပေါင်း ၂၀ လောက်ရှိပြီ။ အကယ်၍ ထိသွားခဲ့ရင် အလဲထိုးဖြစ်သွားမှာ။ အဲဒီအတွက် သူ့ကို လှုပ်မရအောင် ဆိုပြီး နီးနီးကပ်ကပ်နဲ့ ကစားခဲ့ရတာ။ ကျနော့်ရဲ့နည်းစနစ်က ကောင်းခဲ့ပြီး အသုံးချနိုင်ခဲ့လို့ ဒီပွဲတွေက မြန်မြန်ပြီးသွားတာပါ။ MMA မှာက ပညာသားအများကြီးပါတယ်။ သိပ်မကြည့်တတ်သေးလို့ ဖြစ်မှာပါ။ ကျနော် ပြောနိုင်တာကတော့ ဒါတွေက လုပ်ပွဲတွေ မဟုတ်ပါဘူး” ဟု အောင်လအန်ဆန်းက ပြောဆိုသည်။
မြန်မာပြည်ဖွား မြစ်ကြီးနားမြို့သား ချန်ပီယံ အောင်လအန်ဆန်းနှင့် ဟာဆီဂါဝါတို့ပွဲစဉ်ကို အဓိက ဦးတည် ကျင်းပသည့် “ONE : SPIRIT OF A WARRIOR” ပွဲစဉ်ကို ဇွန်လ ၂၉ ရက်နေ့တွင် ရန်ကုန်မြို့၊သုဝဏ္ဏ အားကစားရုံတွင် ကျင်းပသွားမည်ဖြစ်ပြီး အဆိုပါပြိုင်ပွဲတွင် အောင်လပွဲမှလွဲ၍ ကျန်ပွဲစဉ်များမှာ နိုင်ငံခြားသား ဖိုက်တာများ၏ တွဲဆိုင်းများ ဖြစ်သည်။ဝမ်းချန်ပီယံရှစ်တွင် ပထမဆုံး ဝင်ရောက်ထိုးသတ်မည့် ဂျပန်ဖိုက်တာ ဟာဆီဂါဝါကတော့ လက်ရှိမစ်ဒယ်ဝိတ်ချန်ပီယံ အောင်လကို မြန်မာ့မြေပေါ်တွင် အနိုင်ယူ၍ မစ်ဒယ်ဝိတ်ချန်ပီယံ အသစ်အဖြစ် အောင်ပွဲခံမည်ဟု ပြောဆိုထားသည်။ အောင်လအန်ဆန်းကတော့ ယခုပွဲကို အကောင်းဆုံးဖြစ်အောင်ထိုးသတ်သွားမည်ဟု ပြောဆိုသည်။
“အခု ကျနော်အရမ်းကြိုးစားနေတယ်။ ဒီပွဲမှာ အကောင်းဆုံးဖြစ်အောင် လုပ်နေတယ်။ အားလုံးရဲ့ အားပေးမှုတွေကြောင့် အရမ်းအားရှိပါတယ်။ အားလုံးပျော်ရွှင်နိုင်အောင် ကြိုးစားသွားမှာပါ” ဟု အောင်လအန်ဆန်းက ပြောသည်။
ဂျပန်ဖိုက်တာ ဟာဆီဂါဝါ အနေဖြင့် မြန်မာ့မြေပေါ်တွင် ရှုံးပွဲမရှိစံချိန်ထူထားသည့် ချန်ပီယံခါးပတ် ၂ ခုပိုင်ရှင် အောင်လအန်ဆန်းကို ထိုးသတ်အနိုင်ယူကာ မစ်ဒယ်ဝိတ်ချန်ပီယံအသစ်အဖြစ် အောင်ပွဲခံသွားမလား၊မြန်မာတို့၏အချစ်တော် အောင်လအန်ဆန်းကပဲ ဟာဆီဂါဝါကို အနိုင်ယူ၍ ရှုံးပွဲမရှိစံချိန်သစ် ထပ်မံရေးထိုးကာမစ်ဒယ်ဝိတ်လက်ရှိချန်ပီယံဘွဲ့ကို ဆက်လက်ထိမ်းသိမ်းသွားမလားဆိုတာ “ONE : SPIRIT OF A WARRIOR” ပြိုင်ပွဲတွင် ဆက်လက်စောင့်ကြည့်သွားရမည်ဖြစ်သည်။
The post အောင်လအန်ဆန်း မစ်ဒယ်ဝိတ်ချန်ပီယံအဖြစ် ဆက်လက်အောင်ပွဲခံမှာလား appeared first on ဧရာဝတီ.