ပင်ပန်း နွမ်းလျနေရင် အိပ်ယာဝင် လိုက်ပါ
အိပ်မပျော်တာ၊ အိပ်ချင်စိတ်မရှိတာ၊ အိပ်ဖို့ ကြိုးစား မရတာတွေ အပြင် အိပ်တာနဲ့ ပတ်သက်ပြီး စိတ်ညစ်ရတဲ့ အကြောင်းတခု ရှိပါသေးတယ်။ လူတိုင်းလည်း ကြုံဖူးကြမယ် ထင်ပါတယ်။ အိပ်နေရင်း နိုးလာပြီး ပြန်အိပ်မရ တာပေါ့။ အိပ်ရေးဝတာလည်း မဟုတ်၊ နိုးရမယ့် အချိန်လည်း မဟုတ်၊ နိုးပြီး ပြန်အိပ်လို့ မရတော့တာ။ ဒါနဲ့ပတ်သက်ပြီး အမျိုးမျိုး အထွေထွေ ကြုံတာတွေ အတွက် ဖြေရှင်းလို့ ရမယ့် အချက်အလက် ကလေးတွေ ရှိနေတတ်ပါတယ်။
ညလယ်ခေါင် နိုးပြီးရင် ပြန်အိပ်စရာ လိုတော့သလား
ညလယ်ခေါင် အိပ်ယာနိုးပြီး ပြန်အိပ်ဖို့ ကြိုးစားမရတာက အကြောင်းတွေ အများကြီး ရှိပါတယ်။ ဖျားနာတာ၊ ရင်ပူတာ၊ ပူလို့ ချွေးတွေထွက်ပြီး နိုးလာတာ၊ ကိုယ်စားခဲ့ သောက်ခဲ့တာတွေကတမျိုးမျိုးနဲ့ ဒုက္ခပေးကြတာပါ။ စိုးရိမ်သောကတွေ၊ စိတ်ဖိစီးမှုတွေ၊ စိတ်ကျရောဂါတွေလည်း ပါတာပေါ့။ တချို့တော့လည်း အိမ်ထောင်ရေး ပြိုကွဲတာ၊ ချစ်ခင်ကျွမ်းဝင်သူ ဆုံးပါးတာတွေက အကြောင်း ဖြစ်နေတတ် ပါတယ်။ ဘာပဲဖြစ်ဖြစ် အဲဒီ အနေအထားက ပြန်လည် အိပ်စက်ပေးဖို့ လိုအပ်ပါတယ်။
ဝိုင်လေး နှစ်ခွက်လောက် သောက်ထားရင် အိပ်လို့ ကောင်းလေမလား
အယ်လ်ကိုဟောကြောင့်တော့ အိပ်ငိုက်တတ်ပေမယ့် ညဘက်မှာ ကောင်းကောင်းမွန်မွန် အိပ်ရဖို့ ကတော့ အထောက် အကူ မဖြစ်ပါဘူး။ အယ်လ်ကိုဟော သတ္တိပြရင် ရေဆာ၊ ရှုးပေါက်နဲ့ အိပ်ယာကနေ နိုးရ ထရတာတောင် ကြုံနိုင်သေး ရဲ့။ ညစာ စားပြီးချိန်တွေမှာ အယ်လ်ကိုဟော ပါသမျှ ရှောင်သင့်ပါတယ်။ တခွက်နှစ်ခွက် ဆိုတာတောင်မှ လိုအပ်တဲ့ နှစ်နှစ်ခြိုက်ခြိုက် အိပ်စက်မှုကို ထိခိုက်စေပါတယ်။
စိတ်ကျရောဂါကုတဲ့ ဆေးတွေ
အဲဒီဆေးတွေက နှစ်နှစ်ခြိုက်ခြိုက် အိပ်မပျော်အောင် ဟန့်တားတတ် ပြန်ပါတယ်။ ဒီဆေးတွေမှ မဟုတ်ပါဘူး၊ ဆေးအများစု ကတော့ ဒီလိုပဲ ဖြစ်တတ်ပါတယ်။ ဆိုင်တွေမှာ အလွယ်တကူ ဝယ်သောက်နေကြတဲ့ အကိုက်အခဲ ပျောက်ဆေး၊ အအေးမိပျောက်ဆေးတွေက အိပ်ယာကနေ နိုးထစေတဲ့ အစွမ်းတွေ ရှိကြပါတယ်။ သွေးတိုးရောဂါ အတွက် သောက်ကြရတဲ့ ဆီးဆေးနဲ့ Beta-blocker အုပ်စုတွေကလည်း အိပ်ရေးပျက် စေတတ်ပါတယ်။
နိုးပြီးပြန်အိပ်မရရင် ဘာလုပ်သင့်သလဲ
ကြည်အေးရဲ့ ကဗျာလို “အိပ်လို့ မရ ညကြီးမင်းကြီး ထပြီးထိုင်နေ” ကလည်း အမြဲတစေ ကောင်းတဲ့ ကိစ္စမဟုတ် လေတော့ နည်းလမ်း ရှာကြရမှာပါ။ လူးရင်းလှိမ့်ရင်း ထပ်အိပ်ဖို့ ကြိုးစားမလား၊ အိပ်ငိုက်လာအောင် တီဗီလေး ထကြည့် မလား။ တကယ်တော့ နိုးပြီး ၁၅ မိနစ်၊ မိနစ် ၂၀ လောက်မှာ ပြန်အိပ် မရရင် အိပ်ယာထဲကနေ နာရီသံ နားစွင့်နေတာမျိုး ကတော့ အဆိုးဆုံးပါ။ ဖြစ်နိုင်ရင် အိပ်ယာက ထလိုက်ပြီး တခြားနေရာမှာ စာဖတ်တာ၊ ရေချိုးလိုက် တာ၊ သရေစာ ပေါ့ပါးတာလေး စားတာ၊ ဒါမှမဟုတ် တခြားနည်း တခုခုနဲ့ ငြိမ်ငြိမ်သက်သက် နေလိုက်ဖို့ပါ။ ပြီးမှ ပြန်ငိုက်လာချိန် အိပ်ယာထဲ ဝင်လိုက်ပေါ့။
ကောင်းကောင်း အိပ်ပျော်စေတဲ့ အမူအကျင့်တွေ
အဲဒီ အကျင့်တွေကို Sleep hygiene လို့ ခေါ်ကြပါတယ်။ အဲဒါတွေက တနေ့တာ လှုပ်ရှားရုန်းကန်မှုတွေကနေ ညပိုင်း နှစ်နှစ်ခြိုက်ခြိုက် အိပ်မောကျဖို့ရာ အထောက်အကူ ဖြစ်စေပါတယ်။ ပင်ပန်း နွမ်းလျနေရင် အိပ်ယာဝင် လိုက်ပါ။ ကော်ဖီကို အိပ်ယာမဝင်မီ ၄ နာရီကနေ ၆ နာရီအတွင်း မသောက်ပါနဲ့။ အိပ်ခါနီး ဆေးလိပ် မသောက်ပါနဲ့။ ညစာကို မအိပ်မီ အနည်းဆုံး ၃ နာရီလောက်မှာ စားထားပါ။ အိပ်ခန်းက တိတ်ဆိတ်၊ မှောင်ပြီး အေးနေမှသာ အိပ်ပျော်နိုင်မှာပါ။ ဖြစ်နိုင်ရင်တော့ အိပ်ခန်းကို အိပ်ဖို့နဲ့ ချစ်တင်းနှောဖို့ လောက်သာ သုံးသင့်တယ်လို့တောင် ပြောကြပါတယ်။ အိပ်ယာ မဝင်မီ ရေအများကြီး သောက်တာကတော့ ရေချိုးခန်း ခဏခဏ ဝင်ရတဲ့ ဒုက္ခကို ဖိတ်ခေါ်တာပါပဲ။
ဟောက်တတ်သူများ
တခေါခေါ ဟောက်သံ ပြင်းတာကလည်း Sleep hygiene Sleep apnea ခေါ်တဲ့ အိပ်နေရင်း အသက်ရှူ ရပ်သွားတတ်တဲ့ လက္ခဏာ တခုပါ။ အဲဒီအခါကျ လူက ဖျတ်ခနဲ နိုးရပြန်ပါတယ်။ အဲသလို လူမျိုးတွေက မသိလိုက်ရဘဲ တညမှာ အကြိမ်ပေါင်း ရာချီ နိုးနေရတာပါ။ တနေ့လုံးမှာ အိပ်ရေးမဝတာ ခံစားရတော့တာ ပေါ့။ အဲသလို ဖြစ်တာက အန္တရာယ် တခုပါ။ ဟောက်တတ် သူတွေမှာ နှလုံးနဲ့ ပတ်သက်တဲ့ ရောဂါတွေ၊ သွေးတိုးတွေ၊ လေဖြတ်တာတွေ ဖြစ်တတ်တာမို့ အသေအချာ စစ်ဆေးကုသမှု ခံယူပေးရပါလိမ့်မယ်။
ကိုယ်လက် လှုပ်ရှား
နေ့ပိုင်းမှာ ကိုယ်လက်လှုပ်ရှား လုပ်တာက အိပ်စက်ရာမှာ အထောက်အကူ ဖြစ်ပါတယ်။ ပြင်းပြင်းထန်ထန် လုပ်လေ ပိုအိပ် ကောင်းလေလို့တောင် ဆိုပါတယ်။ ထိခိုက်နာကျင် အောင်တော့ မလုပ်ရဘူးပေါ့။ တနေ့မှာ နာရီဝက်လောက် လုပ်ပေးသင့်တာပါ။ ကိုယ်လက် လှုပ်ရှားမှုက ဘယ်အချိန်မဆို (အိပ်ခါနီး အပါအဝင်) လုပ်တာက မလုပ်တာထက် ပိုကောင်းပါတယ်။
ဘာတွေက အိပ်စက်ဖို့ အထောက်အကူပေးသလဲ
အိပ်ခါနီး တီဗီမကြည့်ပါနဲ့။ အဲဒီက အလင်းရောင်ကြောင့် အိပ်စက်ဖို့ အားပေးတဲ့ Melatonin ဟော်မုန်းကို ဖိနှိပ်ရာ ရောက်ပါတယ်။ အခြေအနေပေးရင် ပန်ကာလေး ဖွင့်ထားတာမျိုးက အိပ်လို့ ကောင်းစေပါတယ်။ ဆေးဆိုင်တွေပေါ်က အလွယ်တကူ ရတတ်တဲ့ အိပ်ဆေးတွေလည်း အားမကိုးပါနဲ့။ ရက်တိုလောက်တော့ အဆင်ပြေသလို ဖြစ်ပေမယ့် ကြာလာရင် အာနိသင်က မတိုးတော့တာ ဖြစ်လာပါလိမ့်မယ်။ ဒါတင်မက နောက်နေ့တွေမှာ ဆေးရဲ့ အရှိန်ကျန်ပြီး မလန်းဆန်းတာ၊ နုံးချိ နွမ်းနယ်တာတွေ ဖြစ်နေတတ်ပါတယ်။ အရက်နာကျသလို ခံစားနေရတတ်ပြီး စွဲတာပါ အဖတ်တင်တတ် ပါတယ်။
ကောင်းတဲ့ နည်းလမ်းလေး တခုရှိပါတယ်။ အိပ်ယာကနိုးပြီး ပြန်အိပ်မရတာ များလာရင် မှတ်တမ်းလေး လုပ်ထား ကြည့်ပါ။ Sleep diary ပေါ့။ ဘယ်နေ့မှာ ဘယ်အချိန် အိပ်ယာဝင်တယ်၊ ဘယ်နှကြိမ်နိုးတယ်၊ အဲဒီနေ့က ကော်ဖီ ဘယ်နှခွက်၊ ဘယ်အချိန် နောက်ဆုံး သောက်ထားတယ် စသဖြင့်လေးတွေပေါ့။ အဲဒီအပေါ် မူတည်ပြီး ကိုယ် အိပ်ရေး ဝတဲ့ ညတွေရဲ့ အပြုအမူတွေကို လိုက်နာကျင့်သုံးနိုင်တာပေါ့။ တရေးနိုးသော် အကြံပေါ်၊ ပေါ်တဲ့အကြံ ပြန်အိပ်ရန် ဖြစ်နိုင်ကြပါစေ။ ။
The post ညကြီးမင်းကြီး ထပြီး ထိုင်မနေရအောင် appeared first on ဧရာဝတီ.