ဈေးကွက်မဝင်ဇာတ်ကား များဖြင့် ရုပ်ရှင်ရုံများ ပြန်ဖွင့်ရန် စစ်ကောင်စီ ကြိုးပမ်းနေ

စစ်ကောင်စီ၏ ပြန်ကြားရေး ဝန်ကြီး ဦးမောင်မောင်အုန်းက ရုပ်ရှင်နှင့်အနုပညာလုပ်ငန်းများ မကြာမီ ပြန်စနိုင်ရန် စီစဉ် နေပြီး ရုပ်ရှင်ရုံများ ပြန်လည်ဖွင့်ရေး ပြင်ဆင်နေကြောင်း ရုပ်ရှင်အစည်းအရုံး၊ မြန်မာနိုင်ငံ ဂီတအစည်းအရုံး၊ ရုပ်ရှင် အစည်းအရုံး ယာယီ အမှုဆောင်အဖွဲ့တို့နှင့် သီးခြားစီ တွေ့ဆုံရာတွင် အသိပေးလာသည်ဟု သိရသည်။

အဆိုပါ စစ်ကောင်စီ၏ ပြောဆိုမှုအပေါ် ရုပ်ရှင်လောကသား အများစုကမူ တိုင်းပြည် မငြိမ်မသက် ဖြစ်၍ အများ ပြည်သူ ဒုက္ခရောက်နေချိန် ရုပ်ရှင်ရုံများ ဖွင့်လှစ်ရန် ကြိုးစားနေခြင်းသည် တိုင်းပြည်အေးချမ်းသယောင် ဟန်ဆောင်ခြင်း သက် သက်သာ ဖြစ်သည်ဟု ဝေဖန်ပြောဆိုမှုများ ထွက်ပေါ်နေသည်။

“သူတို့ကတော့ ပုံမှန်လည်ပတ်နေပြီ။ စည်ကားနေပြီဆိုပြီး လုပ်ချင်တာပေါ့ဗျာ။ ဒါပေမယ့် ဒါက ရေမချိုးရသေးတဲ့သူကို သနပ်ခါး လိမ်းပေးသလိုပဲ ဟန်ဆောင်တာပဲ ရှိတာပေါ့။ ဟန်ဆောင်တာပဲ ရှိတာဆိုတော့ ကျနော်တို့ကတော့ ငွေနဲ့ ရင်းရ တာ။ သူတို့က သူတို့ Image တက်ဖို့ လုပ်တာ။ ကျနော်တို့ အနုပညာအလုပ်က ဒီလို အပေါ်ယံလာပြီး မိတ်ကပ် လာလိမ်း လို့ မရဘူး” ဟု ထုတ်လုပ်သူတဦးက ဧရာဝတီသို့ မှတ်ချက်ပြုသည်။

လက်ရှိတွင် စစ်ကောင်စီက ရုပ်ရှင်ရုံများအား ဧပြီလအတွင်း ဖွင့်လှစ်နိုင်ရန် ကြိုးပမ်းနေပြီး၊ ကနဦးတွင် ဈေးကွက် မဝင် သည့် ရုပ်ရှင်ဇာတ်ကား ၁၆ ကားခန့်ကို ပြသရန် လျာထားကြောင်း ရုပ်ရှင်လောကမှ ခိုင်မာသည့် သတင်းရင်းမြစ်တဦးက ဧရာဝတီကို ပြောသည်။

“ဈေးကွက် မဝင်တဲ့ကား ၁၆ ကားလောက် ပြမယ်လို့တော့ အစီအစဉ် ဆွဲတယ် ကြားတယ်။ ဒီလို အခြေအနေမှာ ထုတ် လုပ်သူ အများစုက မပြချင်ဘူး။ ရုံရှင် အများစုကလည်း မပြချင်ဘူး။ ၁၆ ကားတော့ လျာထားတယ်။ နှစ်ဆန်း ၁ ရက်နေ့မှာ စဖွင့်မယ်လို့ ကြားတယ်” ဟု အမည်မဖော်လိုသည့် ရုပ်ရှင်လောကသား တဦးက ဧရာဝတီကို ပြောသည်။

အဆိုပါ ရုပ်ရှင်ရုံများ မကြာခင် ဖွင့်လှစ်နိုင်ရေးအတွက် ရုပ်ရှင်အစည်းအရုံး ယာယီ အမှုဆောင်အဖွဲ့က ထုတ်လုပ်သူ အချို့ နှင့် ရုံပိုင်ရှင်များအား တရက်စီ သီးခြားတွေ့ဆုံကာ ဆွေးနွေးခဲ့ပြီး၊ လက်ရှိအချိန်ထိ ထုတ်လုပ်သူများနှင့် ရုံပိုင်ရှင်များက နှစ်ဦးနှစ်ဖက် ထိပ်တိုက် တွေ့ဆုံ ဆွေးနွေးမှု မပြုရသေးဟု သိရသည်။

မြန်မာနိုင်ငံ ရုပ်ရှင်အစည်းအရုံး ယာယီ အမှုဆောင်အဖွဲ့ ဥက္ကဋ္ဌ ဦးကြည်စိုးထွန်းက “ဘာမှ မသေချာသေးဘူး။ ဆွေးနွေးနေ တုန်းပဲ ရှိသေးတယ်။ ရုံပိုင်တွေနဲ့ ထုတ်လုပ်သူတွေနဲ့ ညှိနှိုင်းနေတုန်းပဲ ရှိပါသေးတယ်။ လှုပ်ရှားနေကြတုန်းပါပဲ” ဟု ဧရာ ဝတီ ကို ပြောသည်။

၎င်းက ဆက်ပြီး “ကျနော်က ကိုဗစ်တွေ ဘာတွေ ရှိတော့ မလုပ်စေချင်သေးပါဘူး။ ရုံပိုင်တွေနဲ့ ထုတ်လုပ်သူတွေ ဆန္ဒရှိရင် တော့ လုပ်ပေးရမှာပေါ့။ ကျနော်တို့က ကြားလူပါပဲ” ဟု ပြောသည်။

ထုတ်လုပ်သူများနှင့် ရုံပိုင်ရှင်များကမူ ၎င်းတို့၏ အနုပညာလောကသားအချို့ စစ်ကောင်စီ၏ ဖမ်းဆီးမှုများမှ လွတ်ကင်းမှု မရှိသေးကြောင်း၊ ရုပ်ရှင်ရုံပေါင်း ၁၆၀ တွင် တဝက်နီးပါးက အပြီးပိုင် ပိတ်လိုက်ရခြင်းနှင့် ပြည်သူလူထုက စားဝတ်နေရေး အတွက် ရုန်းကန်နေရချိန်တွင် ရုပ်ရှင်ရုံများ မဖွင့်လှစ်လိုကြောင်း ၎င်းတို့၏ ဆန္ဒကို ဧရာဝတီသို့ ပြောသည်။

ထုတ်လုပ်သူ တဦးက “ဘာကြောင့် မပြချင်သေးတာလဲဆို တချို့ဆိုလည်း လွတ်ကင်းမှုမှ မရှိသေးတာ။ ပိုင်ဖြိုးသုတို့၊ ကိုပေါက်တို့ လွတ်ကင်းမှု မရှိသေးဘူး။ ပြီးတော့ လူတွေက ဒီအချိန်မှာ ပျော်နေတာ မဟုတ်ဘူးလေ။ စားဝတ်နေရေး အတွက် ရုန်းနေရတော့ ဘယ်သူက ဒီအချိန်မှာ ပြချင်မလဲ”ဟု ဧရာဝတီကို ပြောသည်။

ထို့ပြင် ထုတ်လုပ်သူတချို့ကမူ လုံခြုံမှု မရှိသည့် အခြေအနေကြောင့် ရုပ်ရှင်ရုံများ ပြန်မဖွင့်လှစ်လိုကြပေ။

၎င်းက ဆက်ပြီး “ကျနော်တို့က အဆိုးဆုံး အခြေအနေကို တွေးထားရမှာ။ မြန်မာလူမျိုးက အစွဲအလမ်း ကြီးတယ်။ ရုပ်ရှင်ရုံ မှာ ဗုံးပေါက်သွားပြီဟေ့ဆိုရင် ရုပ်ရှင်ရုံကို မသွားနဲ့ဆိုတဲ့ အစွဲ Image ကို မနည်း ပြန်ဆွဲတင်ရမှာ။ အဲဒါကြောင့် ပိတ်ထား တာပဲ ကျနော်တို့ အနေနဲ့ သဘောကျတယ်။ ထုတ်လုပ်သူ အများစုက အဲဒီလိုပဲ မြင်တယ်” ဟု ပြောသည်။

“ကျနော် ထုတ်လုပ်သူ ကိုယ်တိုင်တောင် ရုပ်ရှင်ရုံကို သွားမကြည့်ရဲဘူး။ ကျနော် ကိုယ်တိုင်တောင် ဒီလောက် လူတွေ ဒုက္ခရောက်နေချိန်မှာ Red Carpet ကို ဘယ်လို ဖီလင်နဲ့ ဘယ်လို အစီအစဉ် လုပ်ရမလဲ” ဟု ၎င်းထုတ်လုပ်သူက မေးခွန်း ထုတ်သည်။

၂၀၂၀ ပြည့်နှစ် ကိုဗစ်ကာလမှ စတင်ကာ စစ်အာဏာသိမ်းသည့် ကာလအတွင်း ရုပ်ရှင်ရုံများ ပိတ်ထားရသည်မှာ ၂ နှစ် တင်းတင်း ပြည့်တော့မည်ဖြစ်ပြီး၊ ယင်းမတိုင်ခင် ပြသရန် ကျန်ရှိနေသော ဇာတ်ကားပေါင်း ၃၆၀ ခန့် ရှိသည်ဟု သိရသည်။

ရုပ်ရှင်ဇာတ်ကား တကားအတွက် ရင်းနှီးငွေ ကျပ်သိန်း ၃၀၀၀ မှ သိန်း ၅၀၀၀ ကြား ရှိသည်ဟု သိရပြီး၊ ရုပ်ရှင်ရုံများ ပိတ် သိမ်းထားသောကြောင့် ဝင်ငွေ ဆုံးရှုံး ထိခိုက်မှုများစွာ ရှိသည်ဟု ရုပ်ရှင်လောကသားများက ဆိုကြသည်။

“ကျနော်တို့ရဲ့ Industry ကြီးက လုံးဝ ပျက်စီးသွားပြီ။ တချို့ ရုပ်ရှင်ရုံတွေဆို မီးလောင်သွားတယ်။ တချို့ဆို ဝန်ထမ်းခ မပေး နိုင်လို့၊ ဆက်ပြီး မထိန်းသိမ်းနိုင်လို့ ပျက်စီး ဆုံးရှုံးမှုတွေ ရှိတယ်”

“ဘယ်သူမှလည်း လာကြည့်ဖို့ အစီအစဉ်လည်း မရှိလောက်ဘူး။ အနုပညာရှင်တွေလည်း လွတ်လွတ်လပ်လပ်၊ တိုင်းသူ ပြည်သားတွေလည်း လွတ်လွတ်လပ်လပ် ပျော်ပျော်ရွှင်ရွှင် ဖြစ်တဲ့အချိန်မှ ကြည့်နိုင်မယ်လို့ ကျနော် ယူဆပါတယ်” ဟု ရုပ်ရှင်လောကသား တဦးက ပြောသည်။

ရုပ်ရှင်ကြည့် ပရိသတ်တဦးက “ကျမက နိုင်ငံခြား ရုပ်ရှင် ကြည့်တာ ပိုများတယ်။ သူများ နိုင်ငံတွေမှာ ဆိုရင် ကိုဗစ်ကာလ မှာ အကန့်အသတ်နဲ့ ရုံတင်ပြတာ ရှိတယ်။ အရင်တုန်းကတော့ ကိုယ်က ရုပ်ရှင် ခရေဇီသမား ဆိုတော့ အဲဒီလိုအရာမျိုး မျှော်လင့်တာပေါ့။ ဒါပေမယ့် အခု အခြေအနေမှာတော့ ရုပ်ရှင်ရုံတွေ ဖွင့်တာကို မကြိုဆိုဘူး။ ဘာပွဲမှ မလုပ်စေချင်ဘူး။ ကိုယ့်စိတ်က မကြည့်ချင်ဘူး” ဟု ဧရာဝတီကို ပြောသည်။

ဒါရိုက်တာ သည်ခေတ်နေက “ရုပ်ရှင်ကြည့်ခြင်း၊ မကြည့်ခြင်းကိစ္စက အာဏာရှင် တသက်လုံးအတွက် ကျွန်ခံချင်ရင်တော့ ခင်ဗျားတို့ရဲ့ သဘောပဲ။ အများပြည်သူ ခံစားချက်တွေ သေနေတဲ့အချိန်မှာ ဒီခံစားမှုတွေအတွက် နှလုံးသားတစုံ အပိုပါတဲ့ လူတွေ လုပ်မယ့် ရုပ်ရှင်ကြည့်ခြင်း၊ မကြည့်ခြင်းက ကိုယ့်အသက် အပို ပါ မပါ အာမခံရမယ့် ကိစ္စပဲ” ဟု ဧရာဝတီသို့ မှတ် ချက်ပြုသည်။

၎င်းက ဆက်ပြီး “အမေ ဒေါ်အောင်ဆန်းစုကြည် ပြောသလိုပေါ့။ အများပြည်သူ စိတ်ဒုက္ခရောက်နေတဲ့ အချိန်မှာ ကိုယ်နဲ့ မဆိုင်သလို နေတာလောက် ရှက်စရာကောင်းတာ မရှိဘူး။ ရုပ်ရှင်ကြည့်ခြင်း၊ မကြည့်ခြင်းက ရုပ်ရှင်ရုံတွေ ဖွင့်တဲ့အပေါ်မှာ ကိုယ့်ရွေးချယ်မှုနဲ့ ကိုယ်ပါပဲ” ဟု ပြောသည်။

စစ်အာဏာရှင်ကို ဆန့်ကျင်ရေး လုပ်ဆောင်နေသည့် သရုပ်ဆောင် ဒေါင်းကလည်း စစ်ကောင်စီမှ ရုပ်ရှင်ရုံများ ပြန်လည် ဖွင့်လှစ်ရန် ကြိုးပမ်း သည့်အပေါ် ပြည်သူများကို ယုံကြည်ကြောင်း၊ ပြည်သူ့ ရပ်တည်ချက်ကသာ အဖြေ ဖြစ်ကြောင်း ဧရာ ဝတီကို မှတ်ချက်ပြုသည်။

ဒေါင်း က “ဒီလို အခြေအနေမှာ ဘယ်ဟာ အမှန်၊ ဘယ်ဟာ အမှားဆိုတာ ပြည်သူတွေ သိပါတယ်။ အာဏာရှင် လက် အောက်မှာ နေတတ်သွားရင် အသက်ပေးခဲ့ရတဲ့ လူငယ်တွေ၊ ပြည်သူတွေအတွက် အားနာမိစရာ ဖြစ်မှာပါ။ အားနာရမှာပါ။ အဓိကနဲ့ သာမည ညီညွတ် မျှတမှု၊ ပြည်သူ့ ရပ်တည်ချက်က အဖြေ ဖြစ်မှာပါ။ ကျနော် အဲဒါကို ယုံကြည်ပါတယ်။ ပြည်သူ တွေပဲ ဦးဆောင်မှာပါ” ဟု ပြောသည်။

You may also like these stories:

လွတ်ငြိမ်းထဲမှာ မပါခဲ့တဲ့ ရဲတိုက်နှင့် ပိုပို

အကျဉ်းကျခံနေဆဲ အမျိုးသမီးထုရဲ့ “Glow Nation” ဘလော့ဂါ ဝင်းမင်းသန်း

အနုပညာရှင်အချို့ ပြန်လွတ်မြောက်သော်လည်း စောဖိုးခွား၊ ပိုပိုနှင့် ရဲတိုက်တို့ မပါသေး

စစ်ကောင်စီ၏ စိန်ရတုပြတိုက်ဖွင့်ပွဲ တက်သည့် အနုပညာရှင်အချို့ ဝေဖန်ခံရ

The post ဈေးကွက်မဝင်ဇာတ်ကား များဖြင့် ရုပ်ရှင်ရုံများ ပြန်ဖွင့်ရန် စစ်ကောင်စီ ကြိုးပမ်းနေ appeared first on ဧရာဝတီ.