ရန်ကုန်တိုင်းအစိုးရ အသုံးစရိတ် ကျပ်ငွေ ၄၁ ဘီလျံ ဘာကြောင့်ဖြတ်တောက်ခံရသလဲ


ရန်ကုန်တိုင်းအစိုးရ ဌာနများက တောင်းခံသော အသုံးစရိတ်များအနက် မိုးပျံလမ်းနှစ်ခုစာနှင့်ညီမျှသည့် စုစုပေါင်း ကျပ်ငွေ ၄၁ ဘီလျှံသည် ပိုလျှံစွာတောင်းခံထားမှုများနှင့် မသုံးစွဲသင့်သည့် အသုံးစရိတ်များဟု ယူဆသောကြောင့် ရန်ကုန်တိုင်း လွှတ်တော်က မကြာသေးမီက ဖြတ်တောက်ခဲ့သည်။

ဇွန်လ ပထမပတ်၌ လာမည့် ၂၀၂၀-၂၁ ဘဏ္ဍာရေးနှစ်အတွက် အစိုးရဌာန ၂၃ ခုက တင်ပြသော ဘဏ္ဍာငွေအသုံးစရိတ် အဆိုပြုချက်ဆိုင်ရာ ဆွေးနွေးမှုများအတွင်း ပြည်သူ့ဘဏ္ဍာ အလေအလွင့် ဖြစ်နိုင်ခြေရှိသော အသုံးစရိတ်အဆိုပြုမှုများကို တိုင်းဒေသကြီးလွှတ်တော်ကိုယ်စားလှယ်များက တွေ့ရှိခဲ့သည်။

ထိုအသုံးစရိတ်ဆွေးနွေးချက်များတွင် အထင်ရှားဆုံး အကြောင်းအရာမှာ ပိုလျှံပြီး ဈေးနှုန်းမြင့်မားစွာ တွက်ချက်တောင်းခံထားသည့် အသုံးစရိတ် အဆိုပြုချက်များဖြစ်နေသည်။

လွှတ်တော်ကိုယ်စားလှယ်များ၏ အများဆုံး ဝေဖန်ခံရသော မူမမှန်မှုများထဲတွင် အမှန်တကယ်လိုအပ်သည်ထက် ပိုတောင်းခံထားသော သယ်ယူပို့ဆောင်ရေးနှင့် လုပ်အားခစရိတ်များ၊ အချို့ပစ္စည်းများတွင် ခန့်မှန်းခြေနှင့် ပြင်ပပေါက်ဈေးများနှင့် လက်တွေ့ကုန်ကျနိုင်သည့်စရိတ်များ များစွာကွာဟနေခြင်း၊ အများပြည်သူ လိုအပ်ချက်များ များစွာ ရှိနေစဉ် မလိုအပ်သော ပစ္စည်းများဝယ်ယူရန် အဆိုပြုခြင်းတို့ ပါဝင်သည်။

၎င်းတို့အနက်တခုမှာ ရန်ကုန်မြို့တော် စည်ပင်သာယာရေးကော်မတီ YCDC ပြန်ကြားရေးဌာနက အခမ်းအနားများတွင် အသုံးပြုရန် သံစုံတီးဝိုင်းတခု ဝယ်ယူရေးအတွက် ကျပ် ၁၃၇.၃၄၅ သန်း တောင်းခံခြင်းဖြစ်သည်။

“ဒီတီးဝိုင်းက မြို့တော်အတွက် ဘယ်လောက်အကျိုးရှိမလဲ။ ဒီထက်ပိုပြီး အရေးကြီးတာတွေ လုပ်ဖို့မရှိတော့ဘူးလား” ဟု ကျောက်တန်းမြို့နယ်မှ တိုင်းလွှတ်တော်ကိုယ်စားလှယ် ဦးဇော်မိုးလွင်က လွှတ်တော်တွင် မေးသည်။

ထိုသို့မြင်သည်မှာ သူတဦးတည်းသာမကပဲ လွှတ်တော်ကိုယ်စားလှယ် အများအပြားကလည်း ထို သံစုံတီးဝိုင်းဝယ်ယူရေး တောင်းဆိုမှုကို ပယ်ချကြသည်။

YCDC က ဈေးများနှင့် ကုန်စည်ပွဲရုံများစီမံခန့်ခွဲရေးအတွက် တောင်းခံမှုတွင် ဈေးအဝင်လမ်းများကို ကွန်ကရစ်ခင်းရန် ၆ လက်မထု ၁ပေဈေးနှုန်းအား သတ်မှတ်ချက်ဖြစ်သော ၁၈၅၀ ကျပ်အစား ၂၂၀၀ ကျပ်ဖြင့် တင်ပြတောင်းခံထားခြင်း၊ ဈေးခြံစည်းရိုးကာရံခြင်းကို သတ်မှတ်ထားသည့် ၁ပေဈေးနှုန်း ၁၅၀၀၀ ကျပ်အစား ၂၀၀၀၀ ကျပ်ဖြင့် ပိုမိုတောင်းခံခြင်းများရှိခဲ့ကြောင်း လွှတ်တော်က စိစစ်တွေ့ရှိခဲ့သည့်အတွက် လျှော့ချခဲ့ရသည်။

တချိန်တည်းတွင် YCDC ရေပေးဝေရေးနှင့်ရေရရှိရေးဌာနက လုပ်ငန်းများအတွက်တောင်းခံသည့် ပုတ်ပြတ်လုပ်သားခများမှာပြင်ပပေါက်ဈေးနှင့် ဆီလျော်ခြင်းမရှိခြင်းနှင့် အဆမတန် ပိုမိုတောင်းခံခြင်းတို့ကြောင့် ကျပ် ၆၅၃ သန်းကျော် လျှော့ချဖြတ်တောက်ခဲ့သည်။

အထက်ပါဖော်ပြချက်များသည် လွှတ်တော်က စိစစ်တွေ့ရှိခဲ့သည့် ပိုလျှံ၍ဈေးနှုန်းမြင့်မားစွာတောင်းခံထားမှုများအနက်မှ အနည်းငယ်မျှသာဖြစ်သည်။

လွှတ်တော်၏ တွေ့ရှိချက်အရ ဝန်ထမ်း ၁၀ ဦးသာရှိသော ငါးလုပ်ငန်းဦးစီးဌာနသည် ဝန်ထမ်း ၁၁ ဦးစာအတွက် ပြည်တွင်းခရီးစရိတ်တောင်းခံသည်။ ထို့အပြင် ကျေးလက်ဒေသဖွံ့ဖြိုးတိုးတက်ရေး ဦးစီးဌာနသည် မြို့နယ်အများစုတွင် ချုံရှင်းမြက်ခုတ်လုပ်ငန်းကို အများဆုံး တမိုင် ၅သိန်းနှုန်းဖြင့် အများဆုံးတွက်ချက်ထားသော်လည်း တိုက်ကြီးမြို့နယ်တွင် ကျပ် ၁၂ သိန်းနှုန်းဖြင့် တွက်ချက်တောင်းခံထားသောကြောင့် စိစစ်လျှော့ချခဲ့ရကြောင်းသိရသည်။

သို့သော် ထိုတောင်းခံမှုနှစ်ခုသည် လမ်းဦးစီးဌာန၏ အရာရှိများစီးသည့် ကား ၃၁ စီးအတွက် တနှစ်စာစက်သုံးဆီအတွက် ကျပ်သန်း ၁၀၇ သန်းကျော် တောင်းခံထားခြင်းနှင့် နှိုင်းယှဉ်လျှင်အသေးအဖွဲ့သာဖြစ်သည်။ ဌာနတွေက အရာရှိတွေကို ခွင့်ပြုထားသည့်ဆီဂါလံထက် များစွာပိုမိုတောင်းခံထားသည့်အတွက် ကျပ် သန်း ၅၀ ကျော်ကို လွှတ်တော်က ဖြတ်တောက်ခဲ့သည်။

သို့သော် လွှတ်တော်ကိုယ်စားလှယ်အများစု စိတ်ပျက်ရသည်က အဆိုပါဌာနက ထိုသို့ပိုမိုတောင်းခံနေမှုသည် ယခုနှစ်မှ မဟုတ်ဘဲ ယခင်နှစ်များမှာလည်း ထိုကဲ့သို့တောင်းခံခဲ့ခြင်းဖြစ်သည်။

“ဘတ်ဂျက်ဆိုတာ စားဖို့ ဝါးဖို့ ခင်းကျင်းပေးထားတဲ့ ဘူဖေးမဟုတ်ပါဘူး။ အခွန်ဆောင်ပြည်သူတွေရဲ့ချွေးနည်းစာဖြစ်ပါတယ်။ အလေ့အလွင့်နည်းအောင် လုပ်သင့်ပါတယ်” ဟု သင်္ဃန်းကျွန်းမြို့နယ် လွှတ်တော်ကိုယ်စားလှယ် ဦးနေဘုန်းလတ်က ပြောသည်။

နောက်ထပ်အငြင်းပွားမှု တခုမှာ ဒဂုံမြို့နယ်တွင် ဓါတ်လှေခါး တပ်ဆင်ထားသော လမ်းဦးစီဌာန တိုင်းဒေသကြီး ညွှန်ကြားရေးမှူးရုံး ၉ ထပ် အဆောက်အအုံ တည်ဆောက်ရန် အသုံးစရိတ် တင်သွင်းခြင်းဖြစ်သည်။ ထိုတောင်းခံမှုကို လွှတ်တော်ကိုယ်စားလှယ်များက အပြင်းအထန်ဝေဖန်သည်။

ယခင်နှစ် အသုံးစရိတ်ဆွေးနွေးပွဲများအတွင်း ၉ ထပ် အဆောက်အအုံတခု တည်ဆောက်ရန် စီမံကိန်းကို ရန်ကုန်တိုင်းလွှတ်တော်က ကန့်ကွက်ခဲ့ပြီး ၆ ထပ်သာ တည်ဆောက်စေရန် ငွေ ၈၈၈ သန်း ချပေးခဲ့ပြီးဖြစ်သည်။

သို့သော် ထိုဌာနသည် လွှတ်တော်ကို အသိပေးခြင်းမရှိဘဲ လျာထားချက်အတိုင်း ဆောက်လက်စဖြစ်နေပြီဖြစ်သည့်အတွက် ခြောက်ထပ်အဆောက်အအုံအတွက် မလိုအပ်သည့် ဓါတ်လှေကားလိုအရာမျိုးတွက် နောက်ထပ် သန်း ၈၅၀ ခွင့်ပြုပေးခဲ့ရကြောင်း ပြည်သူ့ငွေစာရင်း ကော်မတီဝင် ကျောက်တံတားမြို့နယ် လွှတ်တော်ကိုယ်စားလှယ် ဒေါ်ကြည်ပြာပြောသည်။

“ဒီလုပ်ရပ်က လွှတ်တော်ရဲ့ ဆုံးဖြတ်ချက်ကို အလေးမထားရာရောက်တဲ့အပြင် တိုင်းပြည်ရဲ့ဘဏ္ဍာငွေကိုလည်း လက်လွတ်စပယ်အသုံးပြုရာရောက်ပါတယ်… ရုံးအဆောက်အအုံတခုအတွက် မလိုအပ်ပဲ တိုင်းပြည်ဘဏ္ဍာ ကျပ် သန်း ၁၇၀၀ အသုံးပြုလိုက်ရတဲ့သဘောပါ” ဟု သူရှင်းပြသည်။

အများပြည်သူ လိုအပ်ချက်များကို မဖြည့်ဆည်းနိုင်ဘဲ ကောင်းမွန်နေဆဲဖြစ်သောလမ်းကို တိုးချဲ့ပြုပြင်ရန် အသုံးစရိတ်တောင်းခံသောကြောင့်လည်း ဘဏ္ဍာငွေ အသုံးစရိတ်ဆွေးနွေးပွဲများအတွင်း လွှတ်တော်ကိုယ်စားလှယ်များက ဝေဖန်ခဲ့သည်။

အချို့မြို့နယ်များတွင် လမ်းများကောင်းနေဆဲဖြစ်သော်လည်း ထိုလမ်းများကို ကွန်ကရစ် ထပ်ပိုးလွှာများ မြှင့်တင်ခြင်းနှင့် ကားရပ်ရန် လမ်းချဲ့ရေးအတွက် အသုံးစရိတ်တောင်းခံသည်ကို တွေ့ရကြောင်း YCDC လမ်းနှင့်တံတားဌာန၏ တောင်းခံမှုနှင့်ပတ်သက်ပြီး သာကေတမြို့နယ် လွှတ်တော်ကိုယ်စားလှယ် ဒေါ် သက်ထားနွယ်ဝင်းပြောသည်။

ထိုမြို့နယ်များတွင် ရေလွှမ်းမိုးမှု ကာကွယ်ရန် လမ်းမြှင့်တင်မည့်အစား ရေနုတ်မြောင်းစနစ် ကောင်းအောင် ဦးစားပေးသင့်ကြောင်း ဒေါ်သက်ထားနွယ်ဝင်းက ပြောသည်။

ယခုနှစ်တွင် ဌာနအများစုသည် အသုံးစရိတ်တောင်းခံရာတွင် ယခင်နှစ် အသုံးစရိတ်အဆိုပြုစဉ်ကအတိုင်း ပြည်သူလူထု လိုအပ်ချက်ကို အကြီးအကျယ် လျစ်လျူရှုနေကြောင်း ပြည်သူ့ငွေစာရင်းကော်မတီ ဥက္ကဌ လွှတ်တော်က်ိုယ်စားလှယ် ဦးတင့်လွင် က ဧရာဝတီသို့ ဇွန်လ ၅ ရက်နေ့ကပြောသည်။

လွှတ်တော်က ဖြတ်တောက်ခဲ့သော ကျပ်ငွေ ၄၁ ဘီလျံကို လွှတ်တော်ကိုယ်စားလှယ်များတောင်းဆိုသည့် ပစ်ပယ်ခံထားရသော မြို့နယ်များမှ ဖွံ့ဖြိုးရေး စီမံကိန်းများသို့ လွှဲပြောင်းပေးအပ်ခဲ့ကြောင်းလည်း သူပြောသည်။

၂၀၂၀-၂၁ ဘဏ္ဍာရေးနှစ် အသုံးစရိတ်တောင်းဆိုမှုများကို သမ္မတဦးဆောင်သည့် ဘဏ္ဍာရေး ကော်မရှင်သို့ ဆက်လက်တင်ပြရမည်ဖြစ်သည်။

ထိုကော်မရှင်က သုံးသပ်ပြီးနောက် နောက်ဆုံး မဲခွဲရန် တိုင်းလွှတ်တော်သို့ ပြန်လည်ပေးပို့မည်ဖြစ်သည်။

လက်ရှိအချိန်အထိ လွှတ်တော်က ကျပ် ၉၂၀ ဘီလျံတန်ဖိုးရှိ အဆိုပြုချက်များကို အတည်ပြုထားပြီးဖြစ်သည်။

You may also like these stories:

ရန်ကုန်တိုင်းအစိုးရ၏ ထပ်တိုးအသုံးစရိတ် ၂၅ ရာခိုင်နှုန်း အဖြတ်ခံရ

ရန်ကုန်တိုင်း ဝန်ကြီးချုပ်ကို စွပ်စွဲပြစ်တင်မှု ရှုံးနိမ့်

လူရွေးမှားတဲ့ အားနည်းချက်ကို ဒေါ်အောင်ဆန်းစုကြည်နှင့် NLD ပြင်ဖို့လို

The post ရန်ကုန်တိုင်းအစိုးရ အသုံးစရိတ် ကျပ်ငွေ ၄၁ ဘီလျံ ဘာကြောင့်ဖြတ်တောက်ခံရသလဲ
 appeared first on ဧရာဝတီ.