ကမ္ဘာတဝှမ်းက စောင့်ကြည့်နေတဲ့ ထရမ့်နှင့် ကင်ဂျုံအွန် ထိပ်သီးဆွေးနွေးပွဲ

ဧပြီလ ၂၇ ရက်နေ့က မြောက်ကိုရီးယား အာဏာရှင် ကင်ဂျုံအွန်နှင့် တောင်ကိုရီးယား သမ္မတ မွန်းဂျေအင် တို့အကြား သမိုင်းဝင် ထိပ်သီးဆွေးနွေးပွဲ ဖိတ်ခေါ်သော ကာလအတွင်း ပွေ့ဖက်ခြင်းများ၊ လက်ဆွဲနှုတ်ဆက်ခြင်းများနှင့် အပြုံးများကို ထင်ထင်ရှားရှား တွေ့ခဲ့ကြရသည်။ ထို ထိပ်သီးဆွေးနွေးပွဲကို သဘောတရားအရ စစ်ဖြစ်နေဆဲဖြစ်သော နှစ်နိုင်ငံ နယ်စပ် အနီး တောင်ကိုရီးယား နိုင်ငံဘက်ခြမ်းရှိ ငြိမ်းချမ်းရေးဂေဟာ ဟု ခေါ်သော အဆောက်အအုံတွင် ကျင်းပခဲ့သည်။

သင်္ကေတဆန်သော အပြုအမူ အနေဖြင့် ကင်သည် နယ်စပ်မျဉ်းပေါ်မှ ဖြတ်လျှောက်ကာ တောင်ကိုရီးယား နိုင်ငံ ဘက်သို့ ဝင်ရောက်လာပြီး နယ်စပ်မျဉ်းကို ဖြတ်ကျော်ကာ မြောက်ကိုရီးယားဘက်ခြမ်းသို့ လာရောက်လည်ပတ်ရန် မွန်းဂျေအင်ကို ဖိတ်သည်။

ခေါင်းဆောင် ၂ ဦးတို့သည် နှစ်ပေါင်းများစွာ ကွဲကွာနေပြီးမှ ရုတ်တရက်ပြန်လည် တွေ့ဆုံကြသည့် ညီအစ်ကို ဝမ်းကွဲများ သဖွယ် ဖြစ်နေသည်။ ခံစားမှု လှိုင်းထလာသည်ကို ခံစားရသည်ဟု ကင်က ပြောသည်။ ကင်ဂျုံအွန်သည် ညီညွတ်မှု ပြိုကွဲခြင်း၏ သင်္ကေတမဟုတ်ဘဲ ငြိမ်းချမ်းရေး၏ သင်္ကေတ အဖြစ် ရောက်လာသည် ဟု မွန်းဂျေအင်းက ဆိုသည်။

နှစ်နိုင်ငံလုံးမှ မြေ၊ ရေများဖြင့် အထိမ်းအမှတ် သစ်ပင်တပင်ကို စိုက်ပျိုးခြင်း အပြင် ထိပ်သီးဆွေးနွေးပွဲမှ ရရှိသော အခြား ခိုင်မာသည့် တခုတည်းသော ရလဒ်မှာ ငြိမ်းချမ်းရေး၊ စီးပွားတိုးတက်ရေးနှင့် ကိုရီးယားကျွန်းဆွယ် ပြည်လည် ပေါင်းစည်းရေး ဆိုင်ရာ ပန်မုန်ဂျွန် ကြေညာစာတမ်း (Panmunjom Declaration) အမည်ရှိ ပူးတွဲကြေညာချက် တစောင် ဖြစ်သည်။

ထိုကြေညာချက်က ကိုရီးယားစစ်ပွဲ တရားဝင် ပြီးဆုံးကြောင်း ကြေညာရန် အမေရိကန် အပါအဝင် တရုတ်လည်း ပါဝင်နိုင်သော ဆွေးနွေးပွဲများ ကျင်းပရေးကို တောင်းဆိုသည်။ နှစ်နိုင်ငံ ခေါင်းဆောင်များသည် အချိန်ဇယား၊ စည်းကမ်းချက်များနှင့် နျူကလီးယားဖျက်သိမ်းရေးဟူသော ဝေါဟာရကို ရှင်းလင်းဖွင့်ဆိုခြင်း မရှိသည့် ကိုရီးယား ကျွန်းဆွယ်တွင် နျူကလီးယား အပြည့်အ၀ ဖျက်သိမ်းရေးကိုလည်း ကတိကဝတ် ပြုကြသည်။

အလွန်အကျွံ မြင့်မားလှသော မျှော်လင့်ချက်များကို စီမံရန်နှင့် လုံး၀ ပြီးပြည့်စုံသော နျူကလီးယား ဖျက်သိမ်းရေး မကြာမီ ဖြစ်ပေါ်လာလိမ့်မည် ဟူသော အကောင်းမြင်လွန်းခြင်းမျိုးကို ထိန်းချုပ်ရန် ကြိုးစားသည့် အနေဖြင့် နှစ်နိုင်ငံ ခေါင်းဆောင် များသည် စစ်ရေးတင်းမာမှု လျှော့ချနိုင်ပြီး စစ်ဘက်ယုံကြည်မှု တည်ဆောက်ရေးတွင် ကြီးမားသော တိုးတက်မှု ရရှိပြီး သောအခါမှာ လက်နက်ဖြုတ်သိမ်းခြင်းကို အဆင့်လိုက် ဆောင်ရွက်ရန်ကိုသာ သဘောတူကြသည်။

ကာကွယ်ရေး ဝန်ကြီး အဆင့် အပါအဝင် ၎င်းတို့၏ ကာကွယ်ရေး အာဏာပိုင် အသီးသီးတို့သည် နှစ်နိုင်ငံအကြား ပေါ်ပေါက်လာသော စစ်ဘက် ပြဿနာများကို ချက်ခြင်း ဆွေးနွေးဖြေရှင်းရန် ဆွေးနွေးပွဲများ မကြာခဏ ကျင်းပကြမည် ဖြစ်သည်။ တောင်နှင့် မြောက်ကိုရီးယားနိုင်ငံများသည် ဆက်သွယ်ရေးရုံး တခုကို တည်ထောင်မည် ဖြစ်ပြီး တောင်ပိုင်းနှင့် မြောက်ပိုင်း ခွဲခြားလိုက်ခြင်းကြောင့် ဝေးကွာခဲ့သော မိသားစုများ ပြန်လည် ဆုံစည်းခွင့်ကို ခွင့်ပြုမည် ဖြစ်သည်။

ကိုရီးယား နှစ်နိုင်ငံ အပြည့်အ၀ ပြန်လည် ပေါင်းစည်းရန် ဆန္ဒရှိသည့် သဘောမျိုး ကင်ဂျုံအွန်က ဖော်ပြနေသော်လည်း မည်သူက ဦးဆောင်ပြီး မည်သည့် နိုင်ငံရေး၊ စီးပွားရေး အောက်တွင် ပြန်လည် ပေါင်းစည်းရေး ဖြစ်ပေါ်လာမည် ဆိုသည့် မေးခွန်းကိုမူ ဂရုတစိုက် ရှောင်ရှားနေသည်။

“တခုတည်းသော ဘာသာစကား၊ ယဉ်ကျေးမှုနှင့် သမိုင်းကို အသုံးပြုပြီး တောင်နှင့် မြောက်ကိုရီးယားတို့သည် တနိုင်ငံတည်း အဖြစ် ပြန်လည် ပေါင်းစည်းကာ ထာဝရတည်မြဲသော ငြိမ်းချမ်းရေးနှင့် စီးပွားတိုးတက်မှုကို ခံစားကြမည်”ဟု ကင်ဂျုံအွန်က ပြောသည်။

ဆောင်းရာသီတွင် သမ္မတ မွန်းဂျေအင်၏ ပြုံယမ်းခရီးစဉ် အပါအဝင် ထပ်မံ တွေ့ဆုံရန် ခေါင်းဆောင် နှစ်ဦးတို့ လိုလားကြသည်။

ပန်မုန်ဂျွန် ငြိမ်းချမ်းရေး ခေတ်သစ် ကြေညာစာတမ်းသည် အဒေါ့ဟစ်တလာ (Adolf Hitler) နှင့် တွေ့ဆုံပြီးနောက် ဗြိတိန်သို့ ပြန်ရောက်သော အခါ ဗြိတိန် ဝန်ကြီးချုပ် ချိန်ဘာလိန် (Neville Chamberlain) ကြေညာသည့် “ကျွန်ုပ်တို့ခေတ် အတွက် ငြိမ်းချမ်းရေး” အမည်ရှိ ကြေညာစာတမ်းကဲ့သို့ ထပ်မံ ဖြစ်မလာရန်ကိုသာ မျှော်လင့်ရသည်။

မေလ နှောင်းပိုင်း သို့မဟုတ် ဇွန်လဆန်းပိုင်တွင် ကင်ဂျုံအန်နှင့် ထိပ်သီးဆွေးနွေးပွဲ ကျင်းပရန် ရည်မှန်းထားသော သမ္မတ ဒေါ်နယ်လ်ထရမ့် ကလည်း ကင်-မွန်း ထိပ်သီးဆွေးနွေးပွဲကို အပြုသဘော တုံ့ပြန်ခဲ့ပြီး တွစ်တာစာမျက်နှာတွင် အောက်ပါ အတိုင်းရေးသားသည်။

“ဒုံးကျည်တွေ ပစ်လွှတ်၊ နျူကလီးယား စမ်းသပ်မှုတွေ ပြုလုပ်ခဲ့တဲ့ ဒေါသထန်တဲ့ နှစ်များစွာရဲ့ အဆုံးမှာတော့ တောင်နဲ့မြောက်ကိုရီးယား အကြား သမိုင်းဝင် တွေ့ဆုံဆွေးနွေးမှု အခု ပေါ်ပေါက်လာပါပြီ။ ကောင်းမွန်တဲ့ အရာတွေ ဖြစ်ပေါ်လာနေပါပြီ။ အချိန်ကပဲ စကားပြောပါလိမ့်မယ်” ဟု ရေးသားသည်။
ထိုနောက်တွင်လည်း “ကိုရီးယားစစ်ပွဲ အဆုံးသတ်ရမည်။ အမေရိကန်ပြည်ထောင်စုနဲ့ သူ့ရဲ့ ကြီးမြတ်တဲ့ ပြည်သူတွေ အခု ကိုရီးယားမှာ ဖြစ်ပေါ်နေတဲ့ အခြေအနေတွေ အတွက် ဂုဏ်ယူသင့်တယ်” ဟုလည်း သူက ဆက်ရေးသည်။

သူ၏ အပြင်းထန်ဆုံး ဖိအားပေးရေး မဟာဗျူဟာကို ဖြေလျှော့ မပေးမီ မြောက်ကိုရီးယားသည် နျူကလီးယားလက်နက်များ အပြည့်အ၀ ဖျက်သိမ်းရေးတွက် ကြီးမားသော တိုးတက်မှုများ ဆောင်ရွက်လာသည်ကို မြင်ရရလိမ့်မည်ဟု ဆက်လက် ပြောဆိုမှုသည် သမ္မတ ထရမ့်၏ အလောတကြီး လိုလားမှုကို ဖော်ပြနေသည်။

“အရင်က အမေရိကန်ကို မြောက်ကိုရီးယားက တယောလေးလို ထိုးနေတာ (သူ့လိုလားမှု အကျိုးစီးပွားအတွက် လှည့်ပတ် ပြောဆို လုပ်ဆောင်နေတာ)” ဟု ထရမ့်က သောကြာနေ့တွင် ပြောသည်။

“အခုတော့ ဒီလိုမျိုး လုပ်လို့ မရတော့ဘူး။ သူဟာ တကယ်မှန်ကန်တဲ့သူ ဟုတ်မဟုတ် ဆိုတာဟာ ကင်ဂျုံအန်ဟာ သူ့အဖေ၊ အဖိုးတွေရဲ့ ခြေရာကို လိုက်ပြီး ကျနော်တို့ကို လှည့်စားတဲ့ ဆွေးနွေးရေး စားပွဲမျိုးကို ရှောင်ရှားလိုတယ် ဆိုတဲ့ အချက်ကို သူ လိုက်နာခြင်း ရှိ/မရှိအပေါ်မှာ မူတည်တယ်” ဟုလည်း ထရမ့်က ဆက်လက်ရေးသားသည်။

ယခင်က တောင်နှင့်မြောက် ကိုရီးယား ခေါင်းဆောင်များကြား ထိပ်သီး ဆွေးနွေးပွဲများနှင့် စစ်ကို တရားဝင်အဆုံးသတ်ရန် တောင်းဆိုမှုများသည် ခရီးမရောက်ခဲ့ပေ။ စီးပွားရေး အခွင့်အရေးများ အတွက် နျူကလီးယား အစီအစဉ်ကို ရပ်ဆိုင်းရေး ကတိကဝတ်များကို မြောက်ကိုရီးယား နိုင်ငံက အကြိမ်ကြိမ် ချိုးဖောက်ခဲ့သည်။

ယခုတကြိမ်တွင် ထိုသို့ မဖြစ်စေရဟု ကင်ဂျုံအွန်က ပြောသည်။ ယခင် ကိုရီးယား နှစ်နိုင်ငံ သဘောတူညီချက်များ မအောင်မြင်ရသည့် ကံမကောင်း အကြောင်းမလှသော သမိုင်းကို တပတ်မလည်စေရန် ကတိပြုသည်။ သူ့ကို မည်သည့် အတွက် ယုံကြည်သင့်သနည်း။

မြောက်ကိုရီးယား၏ နျူကလီးယားလက်နက်များသည် ကိုရီးယား ကျွန်းဆွယ်နှင့် အရှေ့မြောက်အာရှ ဒေသ လုံခြုံရေးကို အခိုင်အမာ ကာကွယ်ပေးနေသော အင်အားကြီးမားသည့် ကြိုတင် ကာကွယ်ရေး လက်နက်များ ဖြစ်သည် ဟု မကြာသေးမီကပင် ကင်ဂျုံအွန်က ပြောခဲ့သည်။

မှတ်သားစရာ ကောင်းသည်မှာ ထိုပူးတွဲ ကြေညာချက်သည် မြောက်ကိုရီးယားဘက်က အပြည့်အ၀ နျူကလီးယား ဖျက်သိမ်းရေး ကတိကဝတ်ပြု လုပ်သောအခါ မြောက်နှင့် တောင်ကိုရီးယား နှစ်နိုင်ငံတို့ အကြား တရားဝင် ငြိမ်းချမ်းရေး သဘောတူစာချုပ် သို့မဟုတ် စီးပွားရေး ပူးပေါင်းဆောင်ရွက်မှု အတွက် စည်းမျဉ်းများကို ဖော်ပြ မထားခြင်း ဖြစ်သည်။ နျူကလီးယားလက်နက် အပြည့်အ၀ ဖျက်သိမ်းရေးနှင့် ပတ်သက်သည့် ခိုင်မာသော ခြေလှမ်းများကိုပင် ထိုစာချုပ်တွင် ဖော်ပြထားခြင်း မရှိပေ။

“ပုံမှန် မဟုတ်သော လက်ရှိ အပစ်အခတ် ရပ်စဲရေးကို အဆုံးသတ်ရန်နှင့် ကိုရီးယား ကျွန်းဆွယ်တွင် တောင့်တင်း ကြံ့ခိုင်သော ငြိမ်းချမ်းရေး စနစ် ထူထောင်ရေးသည် မည်သည့်အကြောင်းကြောင့်မျှ နှောင့်နှေးထားရန် မဖြစ်နိုင်တော့သော သမိုင်းပေး တာဝန်ဖြစ်သည်” ဟု ထိုကြေညာချက်က ဖော်ပြသည်။

“ခေါင်းဆောင် နှစ်ဦးတို့သည် ယခုနှစ် ဆွေးနွေးပွဲများ၏ ရလဒ်အဖြစ် အပစ်အခတ် ရပ်စဲရေးကို ငြိမ်းချမ်းရေး စာချုပ်အဖြစ် ပြောင်းလဲပစ်ရေးနှင့် တည်မြဲခိုင်မာသော ငြိမ်းချမ်းရေး စနစ်ထူထောင်ခြင်းဖြင့် စစ်ကို အဆုံးသတ်ရန် ရည်ရွယ်သည်” ဟုလည်း ထိုကြေညာချက်တွင် ဖော်ပြထားသည်။

ညီမျှသော စီးပွားရေး ဖွံ့ဖြိုးတိုးတက်မှုနှင့် နိုင်ငံများ ပူးပေါင်းကြွယ်ဝချမ်းသာခြင်း အတွက် ၂၀၀၇ ခုနှစ် အောက်တိုဘာလ ၄ ရက် ကြေညာချက်တွင် ယခင် သဘောတူညီပြီးသော စီမံကိန်းများ အကောင်အထည်ဖော်ခြင်းဖြင့် စီးပွားရေး ပူးပေါင်း ဆောင်ရွက်မှုကို ချက်ချင်းစတင်မည် ဖြစ်သည်။

တောင်ကိုရီးယားနိုင်ငံ အတွက်ထက် မြောက်ကိုရီးယား နိုင်ငံအတွက် ပိုမို အကျိုးရှိစေသော စီမံကိန်းတခုကို စတင်လုပ်ဆောင်ခြင်းသည် ပထမဆင့် ဖြစ်သည် ဟု နှစ်နိုင်ငံခေါင်းဆောင်းများက သဘောတူကြသည်။ ထိုစီမံကိန်းမှာ အရှေ့ပိုင်းသယ်ယူပို့ဆောင်ရေး စင်္ကြန်နှင့် ဆိုးလ်နှင့် စင်နွိုင်ဂျူမြို့ အတို့အကြား ရထားလမ်းများ၊ ကားလမ်းများ ခေတ်မီရေးနှင့် ဆက်စပ်ရေးတို့ ဖြစ်သည်။

တဖက်ကကြည့်လျှင် ကိုရီးယား ခေါင်းဆောင်များ၏ နျူကလီးယား ဖျက်သိမ်းရေးနှင့် ပတ်သက်သော ကြေငြာချက်မှာ ပိုမို ယေဘုယျ သဘော ဆန်သည်။ ၎င်းတို့သည် နျူကလီးယားကင်းမဲ့သော ကိုရီးယားကျွန်းဆွယ်ကို နျူကလီးယား လက်နက်များ လုံး၀ ဖျက်သိမ်းခြင်းဖြင့် အကောင်အထည်ဖော်ရေး ဘုံရည်မှန်းချက် ဟု ရည်ညွှန်းပြောဆိုပြီး ထို ရည်မှန်းချက်နှင့် ပတ်သက်သော အခန်းကဏ္ဍနှင့် တာဝန်ဝတ္တရားများကို အကောင်အထည် ဖော်ရန် သဘောတူသည် ဟုလည်း ဆိုသည်။

ပဏာမအနေဖြင့် ပြောရပါက နျူကလီးယား လက်နက်ကင်းမဲ့သော တောင်ကိုရီးယားနိုင်ငံ အတွက် မည်သည့် နျူကလီးယား ဖျက်သိမ်းရေး အခန်းကဏ္ဍနှင့် တာဝန်ဝတ္တရားများ ရှိသနည်း ဟု မေးရမည် ဖြစ်သည်။ ကိုရီးယား ကျွန်းဆွယ်တွင် မြောက်ကိုရီးယားတွင်သာ နျူကလီးယား လက်နက်ရှိသည်။ ထိုလက်နက်များကို ပြန်လည် ပြင်ဆင်မရနိုင်စေရန် လက်တွေ့ကျကျ ဖယ်ရှားပြစ်ရေးသည် မြောက်ကိုရီးယား၏ တခုတည်းသော တာဝန်ဝတ္တရား ဖြစ်နေသည်။

နိုင်ငံတကာ စစ်ဆေးရေး အရာရှိများ၏ စောင့်ကြည့်မှု အောက်တွင် နျူကလီးယား လက်နက်တခု သို့မဟုတ် ဒုံးကျည် ထုတ်လုပ်ရေး အဆောက်အအုံတခုကို ဖျက်သိမ်းရန် သို့မဟုတ် နျူကလီးယား လောင်စာများကို ဖျက်ဆီးရန် သို့မဟုတ် နိုင်ငံမှ ထုတ်ယူသွားရန် ကင်ဂျုံအန်က ကတိမပြုမီကပင် အထက်ပါ ပူးတွဲကြေညာချက်သည် မြောက်ကိုရီးယားနိုင်ငံ၏ နျူကလီးယားလက်နက်များ ဖျက်သိမ်းရန် အဓိပ္ပာယ်ရှိသော နည်းလမ်းများ အတွက် ချီးကျူးဂုဏ်ပြုသည်။

“မြောက်ကိုရီးယားနိုင်ငံက ဆောင်ရွက်နေသော အစီအစဉ်များသည် လွန်စွာ အဓိပ္ပာယ် ပြည့်ဝပြီး ကိုရီးယားကျွန်းဆွယ် တွင် နျူကလီးယားလက်နက် ဖျက်သိမ်းရေး အတွက် လွန်စွာအရေးပါသည်ဟု တောင်နှင့်မြောက် ကိုရီးယားနှစ်နိုင်ငံတို့က တူညီစွာ မြင်ကြသည်”ဟု ရေးသားထားသည်။

မြောက်ကိုရီးယားနိုင်ငံ၏ တောင်ထူထပ်သော ဒေသမှ နျူကလီးယား စမ်းသပ်ရေး စခန်းကို ပိတ်ပစ်မည့် ကင်ဂျုံအန်၏ ခမ်းနားလှသော အစီအစဉ်မှာ ငြိမ်းချမ်းရေး အတွက် မဟုတ်ကြောင်း ဖော်ပြနေသည့် လက္ခဏာများလည်း ရှိနေသည်။ ဖြစ်နိုင်ခြေရှိသော အကြောင်းရင်းမှာ ထိုစမ်းသပ်စခန်းသည် ပြိုကျခဲ့ပြီးသောကြောင့် ဖြစ်သည်။

သို့သော် ကင်ဂျုံအွန်သည် ဝါဒဖြန့်ချိရေး ဆိုင်ရာ အကျိူးအမြတ်များကို ရသလောက်ယူနေပြီး လာမည့်လတွင် ကျင်းပမည့် နိုင်ငံ၏ တခုတည်းသော လူသိရှင်ကြား ဖြစ်ပြီးသည့် ထိုမြေအောက် စမ်းသပ်ခန်း ပိတ်ပွဲသို့ တောင်ကိုရီးယားနှင့် အမေရိကန်တို့မှ ကျွမ်းကျင်သူများနှင့် သတင်းသမားများကို ဖိတ်ကြားရန် စီစဉ်နေသည် ဟု နယူးယောက်တိုင်းမ် သတင်းစာ၏ အဆိုအရ သိရသည်။

ပြည့်စုံ၍ လက်တွေ့ကျသော နျူကလီယားဖျက်သိမ်းရေး အတွက် မြောက်ကိုရီးယား နိုင်ငံဘက်က စစ်မှန်သော တိုးတက်မှုများကို မပြသမီ တောင်ကိုရီးယား အနေဖြင့် ပုံမှန် သံတမန်ရေးနှင့် စီးပွားရေး ဆက်ဆံမှုများ ထူထောင်ရန် အားပေးပြီးနောက် ကင်ဂျုံအွန် နှင့် ထရမ့်တို့ တွေ့ဆုံကြမည် ဖြစ်သည်။

မြောက်ကိုရီးယားနိုင်ငံသည် ငြိမ်းချမ်းရေး တံခါးဖွင့်ပြီး အဆင်ပြေအောင် ဆောင်ရွက်နေချိန်တွင် မြောက်ကိုရီးယား နိုင်ငံ အပေါ် ပြင်းထန်သော စီးပွားရေး ပိတ်ဆို့မှုများ ကျင့်သုံးရန် တရုတ်နိုင်ငံ၏ ဆက်လက် ထောက်ခံမှုကို ထရမ့် အနေဖြင့် ဆက်လက် အားကိုးနိုင်ခြင်း မရှိတော့ပေ။

စကားလုံးများထက် လုပ်ရပ်များကသာ အရေးပါကြောင်း မြောက်ကိုရီးယားနှင့် အီရန်နိုင်ငံဆိုင်ရာ များတွင် ထရမ့်၏ သဘောထား တင်းမာသော အမျိုးသား လုံခြုံရေး အကြံပေးသစ် ဂျွန် ဘိုလ်တန်က သတိပေးရင်း သဘောထား အစစ်အမှန်ကို ဖော်ပြသည်။

“စစ်မှန်တဲ့ ကတိကဝတ်တွေကို ကျနော်တို့ တွေ့မြင်လိုတယ်။ မြောက်ကိုရီးယားနိုင်ငံက ဝါဒဖြန့်ချိ လုပ်ဆောင်တာတွေကို ကျနော်တို့ မတွေ့မြင်လိုဘူး။ စကားလုံးတွေပဲ တွေ့နေရတယ်၊ ခုချိန်အထိတော့ စကားလုံးတွေချည်းပဲ တွေ့နေရသေးတယ်။ မြောက်ကိုရီးယားရဲ့ ဝါဒဖြန့်ချိရေး ကျမ်းကတော့ အကန့်အသတ် မရှိ ကြွယ်ဝလှတဲ့ ရင်းမြစ်တခုပါပဲ” ဟုလည်း သူက CBS ရုပ်သံ၏ “Face the Nation” အစီအစဉ်တွင် ပြောသည်။

ကင်ဂျုံအွန်သည် ကိုရီးယားကျွန်းဆွယ်တွင် ငြိမ်းချမ်းရေး အတွက် အလားအလာရှိလျှင် ထရမ့်၏ အပြင်းထန်ဆုံး စီးပွားရေး ဖိအားပေးရေး မဟာဗျူဟာ အစီအမံ၊ တောင်ကိုရီးယားနှင့် တရုတ်နိုင်ငံတို့က ဆက်လက်ထောက်ခံမှုကို အမေရိကန်က ရပ်တန့်စေရန် စီစဉ်ထားရှိမှုများ စသည့် အရေးယူ ပိတ်ဆို့မှုများကို အလျင်အမြန် ရုတ်သိမ်းခြင်းကို လိုလားသည်။

သူ မည်သည့် စကားများကို ပြောဆိုသည် ဖြစ်စေ သူ အကြီးအကျယ် ရင်းနှီးမြှုပ်နှံထားခဲ့သော နျူကလီးယား လက်နက်များနှင့် ဒုံးကျည်များ အားလုံးကို ကင်ဂျုံအွန်သည် မည်သည့်အခါတွင်မျှ စွန့်လွှတ်မည် မဟုတ်ပေ။

အလွန်ဆုံး ဖြစ်နိုင်ခြေမှာ ရှည်လျားလှသော ဆွေးနွေးပွဲများ အပြီးတွင် အတွင်းရေးလျှို့ဝှက်ချက်များကို စုံစမ်းစစ်ဆေးခြင်း မပြုသော စနစ်အရ သူ၏ နျူကလီးယားနှင့် ဒုံးကျည် အစီအစဉ်များကို အရှိန်အဟုန် လျှော့ချမည့် အနေအထားသာ ဖြစ်နိုင်သည်။

ထရမ့် အနေဖြင့် ကင်ဂျုံအွန်နှင့် ထိပ်သီးဆွေးနွေးပွဲ ဆွေးနွေးမည် ဆိုလျှင် သူ အမေရိကန် သမ္မတ မဖြစ်လာမီက သူ၏ စီးပွားရေးလုပ်ငန်းများတွင် လမ်းညွှန်ဖြစ်သည့် “ပစ္စည်းတခု၏ အရည်အသွေးကို နားလည်ရေးမှာ ဝယ်သူ၏ တာဝန်သာ ဖြစ်သည်” ဟူသကဲ့သို့ပင် ကင်ဂျုံအွန် ကတိပေးသမျှ အရာရာကို သတိပြု စစ်ဆေး ကြည့်ရှုရမည် ဖြစ်ပေသည်။

( www.frontpagemag.com ပါ Joseph Klein ၏ All eyes on upcoming Trump-Kim Jong-un Summit ကို ဘာသာပြန်ဆိုသည်)

The post ကမ္ဘာတဝှမ်းက စောင့်ကြည့်နေတဲ့ ထရမ့်နှင့် ကင်ဂျုံအွန် ထိပ်သီးဆွေးနွေးပွဲ appeared first on ဧရာဝတီ.