အရင်က ကျနော်တို့ သိထားခဲ့တာက အုန်းဆီဟာ အစာချေ စနစ်ထဲကို ရောက်ရှိသွားသည့်တိုင် ခန္ဓာကိုယ်တွင်း ကျန်ရှိမှု နည်းပါးပြီး အညစ်ကြေးစွန့်စနစ်ထဲ အလွယ်တကူ ပါရှိသွားတာကြောင့် ကျန်းမာရေးအတွက် ဆီစားမယ်ဆိုရင် အုန်းဆီကို စားဖို့ သင့်တယ်လို့ ဆိုခဲ့ကြပါတယ်။
အခုတော့ အခြား စမ်းသပ်ချက်တွေအရ အုန်းဆီဟာလည်း အမဲသားကနေ ရရှိတဲ့ အဆီမျိုး၊ ထောပတ်တို့လိုပဲ ကျန်းမာ ရေးအတွက် မသင့်တော်ဘူးလို့ ဆိုလာပါပြီ။
အမေရိကန် နှလုံးဆိုင်ရာ အဖွဲ့အစည်းကနေ လေ့လာချက်တွေအရ အုန်းဆီဟာ ကိုလက်စထရောဓာတ် မြင့်မားစေပြီး ကျန်းမာရေးအတွက် မသင့်လျော်ဘူးလို့သိလာရတာပါ။
လက်ရှိဈေးကွက်အများစုမှာတော့ အုန်းဆီကို ကျန်းမာရေးအတွက် စားသုံးမယ်ဆိုရင် အဆင်ပြေသင့်တော်တယ်လို့ ဆို ထားတဲ့အနေအထားမှာ လေ့လာချက်အသစ်အရတော့ ဈေးကွက်မှာ အနည်းငယ် ပြောင်းလဲမှုတွေ ရှိလာနိုင်တာပါ။
ဒီနေရာမှာ အရင်က လေ့လာချက်တွေကို ပြန်ကြည့်မယ်ဆိုရင် စားသုံးဆီအတွက်ကတော့ တိရိစ္ဆာန်တွေဆီကနေ ရရှိတဲ့ ဆီတွေထက် အသီးအနှံတွေကနေ ရရှိတဲ့ ဆီတွေက ဘေးထွက်ဆိုးကျိုးနည်းသလို ပြည့်ဝဆီ အဖြစ် ရရှိခဲ့တာ ဖြစ်ပါ တယ်။
အထူးသဖြင့်တော့ နေကြာဆီနဲ့ သံလွင်ဆီလို ဆီတွေကို စားသုံးကြတာလည်း များပါတယ်။ ဓာတုဗေဒ သဘောတရား အရ ကြည့်မယ်ဆိုရင် ဘယ်ကနေ ရရှိတဲ့ ဆီပဲ ဖြစ်စေ အဆိုပါ ဆီရဲ့ဖွဲ့စည်းမှုမှာ တည်မြဲ ဆီ ပါရှိမှုကို ကြည့်ပြီး စားသုံးဖို့ သင့်တယ်၊ မသင့်ဘူး ဆုံးဖြတ်ခဲ့ကြတာပါ။
တည်မြဲဆီဆိုတာကတော့ ကျနော်တို့ ခန္ဓာကိုယ်အတွက် ကောင်းကျိုးမပေးတဲ့ ဆီတွေပါ။ ကိုလက်စထရောကို မြင့်မားစေ ပါတယ်။ သွေးကြောတွေထဲမှာ အနည်ထိုင်မှုတွေ ဖြစ်စေပါတယ်။ ဒီလို သွေးကြောထဲမှာ အဆီအနည်ထိုင်မှုက နှလုံးရော ဂါနဲ့ လေဖြတ်ခြင်းလို ရောဂါတွေကို ဖြစ်လာစေဖို့ ရာခိုင်နှုန်း များစေပါတယ်။
AHAအဖွဲ့ရဲ့ လေ့လာချက်တွေ အရတော့ အုန်းဆီမှာ တည်မြဲဆီက ၈၂ရာခိုင်နှုန်းလောက် ထိအောင် ပါရှိနေတာပါ။ ထော ပတ်မှာ ၆၃ရာခိုင်နှုန်း၊ အမဲသားကနေ ရတဲ့ ဆီမှာ ၅၀ရာခိုင်နှုန်း၊ ဝက်သားကနေ ထုတ်ယူတဲ့ ဆီမှာ ၃၉ ရာခိုင်နှုန်းဆီ ပါရှိ ပါတယ်။
AHAကတော့ အုန်းဆီ အနေနဲ့ တည်မြဲဆီပါဝင်မှုနှုန်း များလို့ စားသုံးဖို့ မသင့်ဘူးလို့ ဆိုပေမယ့် အရင်က သိထားတဲ့ အ တိုင်း အစာချေစနစ်မှာ အုန်းဆီက ခန္ဓာကိုယ်ထဲ ဝင်ရောက်မှု နည်းပြီး အညစ်ကြေးစွန့်စနစ်ဆီကို အလွယ်တကူ ရောက် သွားလို့ တကယ်လို့ အုန်းဆီကို စားမယ်ဆိုရင် သူ တမျိုးတည်း အဓိက မစားဘဲ အခြား ဆီ တခုခုနဲ့ ရောစပ် စားသုံးမယ် ဆိုရင် အဆင်ပြေနိုင်တယ်လို့ ဆိုလာပါတယ်။
သူတို့ကတော့ အုန်းဆီကို နေကြာဆီ၊ သံလွင်ဆီ တခုခုနဲ့ ရောစားဖို့ ပြောထားပါတယ်။
ဒီနေရာမှာ ဆီစားများလို့ ကိုယ်တွင်း ကိုလက်စထရော မြင့်မားလာရင် ချွေးထွက်လည်း နည်းလာပြီး ကျန်းမာရေးနဲ့ မကိုက် ညီတော့ဘူးလို့ AHA ရဲ့ ခေါင်းဆောင်တဦးဖြစ်တဲ့ ဒေါက်တာ Frank Sacks က ပြောပါတယ်။
အင်္ဂလန် အခြေစိုက် လူထုကျန်းမာရေး အဖွ့ဲကတော့ အမျိုးသား တယောက်အနေနဲ့ တရက်ကို ဆီ ၃၀ ဂရမ်ထက် ပိုမစား ဖို့၊ အမျိုးသမီး တစ်ယောက် အနေနဲ့ ၂၀ဂရမ်ထက် ဆီ ပိုမစားဖို့ အကြံပေးထားတာလည်း တွေ့ရပါတယ်။
တကယ်တော့ အဆီဓာတ် အနေနဲ့က ခန္ဓာကိုယ်အတွက် မလိုအပ်တာတော့လည်း မဟုတ်ပါဘူး။ ဆီဆိုတာ Fatty Acid ရရှိဖို့အတွက်လည်း အစာအရင်းအမြစ် ဖြစ်သလို ဗီတာမင် A, D, Eတွေကို စုပ်ယူမှုလည်း အားကောင်းစေပါတယ်။
အင်္ဂလန် နှလုံးဆိုင်ရာ အဖွဲ့အစည်းက Victoria Taylor ကတော့ လူတိုင်း ဆီမစားနဲ့လို့ မဆိုလိုပါဘူး၊ တည်မြဲဆီပါရှိမှုများ တဲ့ ဆီတွေကို စားသုံးမှု လျော့ချဖို့နဲ့ ဖြစ်နိုင်ရင် မစားသုံးဖို့ပဲ အကြံပေးချင်ပါတယ်လို့ ဆိုပါတယ်။ အကြံပေးချင်တာက တော့ ပြည့်ဝဆီများတဲ့ ဆီတွေကို မသုံးဘဲ အက်ပိုဂါးဒိုးဆီ၊ ငါးတွေကနေ ရရှိတဲ့ ဆီ၊ မြေပဲဆီတွေကို သုံးဖို့ပဲ ပြောချင်ပါတယ်လို့ ဆိုပါတယ်။
အဆီကို အတတ်နိုင်ဆုံး မစားဖြစ်အောင် အကြံပေးချက်တွေမှာလည်း အစားအစာကို ပြုတ်၊ ဖုတ်၊ ဖျောစားသုံးဖို့ ဆိုထား ပြီး ကြော်စားတာတွေ၊ ကင်စားတာတွေကို ရှောင်ဖို့၊ အသားတွေမှာ မချက်ခင်ကတည်းက အဆီပြင်တွေကို တွေ့နေရရင် ချက်မစားဘဲ ဖယ်ထုတ်ပစ်ဖို့၊ ဟင်းလျာတိုင်းမှာ ဆီကို တဇွန်းထက် ပိုမသုံးဖို့၊ ဆန်းဒဝှစ်လို အသင့်စား မုန့်တွေ လုပ်စား ချိန်မှာ ထောပတ်လို အရာတွေ လျှော့ထည့်ဖို့ အကြံပေးချက်တွေ တွေ့ရပါတယ်။
အသားထက် အသီးအရွက်ကို ပိုစားဖို့ သင့်သလို ကိုယ်တွင်း ကိုလက်စထရောဓာတ်ကို အနိမ့်ဆုံးနဲ့ ပုံမှန်ဖြစ်အောင် ထိန်း ထားဖို့ သင့်နေတာ ဖြစ်ပြီး ဆီစားနှုန်း လျော့လိုက်ရင်တော့ အဆင်ပြေလာမှာ ဖြစ်တယ်လို့ ဆိုပါတယ်။
အုန်းဆီကိုတော့ အရင်လို တမျိုးတည်း အဓိက ထားမသုံးတော့ဘဲ အခြား ဆီတခုခုနဲ့ ရောစပ် အသုံးပြုဖို့ လိုအပ်နေပြီ ဖြစ် ပါတယ်။
Ref: www.bbc.com
The post အုန်းဆီဟာ ကျန်းမာရေးအတွက် မသင့်တော် ဟုဆို appeared first on ဧရာဝတီ.